Aqtaýdaǵy ortalyq dańǵylǵa Nursultan Nazarbaev esimi berildi
Búgin Mańǵystaý oblystyq máslıhatynyń otyrysynda depýtattar osyndaı sheshim qabyldady. Atalmysh ortalyq dańǵyl 1-shi yqsham aýdandaǵy Aqbota saıabaǵynan bastap, 17-shi yqsham aýdandaǵy «Grın Park» turǵyn úı keshenine deıin jalǵasyp jatyr.
Qazaqstan Respýblıkasynyń Úkimeti janyndaǵy Respýblıkalyq onomastıka komıssııasynyń 2019 jylǵy 20 naýryzdaǵy qorytyndysy negizinde «Qazaqstan Respýblıkasynyń ákimshilik-aýmaqtyq qurylysy týraly» 1993 jylǵy 8 jeltoqsandaǵy Qazaqstan Respýblıkasy Zańynyń 11-babynyń 4-1) tarmaqshasyna sáıkes qabyldanǵan sheshim.
Sessııada sóz alǵan máslıhat depýtaty Tabyldy Ámirov: «Elbasymyz qıyn-qystaý kúnderde bizdi tyǵyryqtan shyǵaryp, búkil álemge Qazaq elin tanytqan tulǵa. Ol eńbegin búkil halqymyz moıyndap, alǵysyn aıtýda. Dál osy sátte Nursultan Ábishulyna qandaı madaqtaý aıtsaq ta artyq emes. Onyń ústine tarıhı oqıǵa kúni Májiliste aıtylǵan usynystar ıaǵnı Astanaǵa esimin berý, monýment qoıý, oblys ortalyqtarynda úlken kósheler berip, ulyqtaý óte durys. Ol halyqtyń oıynan shyǵyp jatyr. Biz de búgin bir kisideı jınalyp, uly sheshim qabyldadyq. Biz bir bolyp, óńir basshysymen birge Elbasynyń bastaǵan isin ári qaraı jalǵastyrýǵa ázirmiz. Nursultan Ábishulynyń denine saýlyq, otbasyna amandyq tileımin»,-dedi.
Jıyn sońynda oblys ákimi Eraly Toǵjanov Mańǵystaý turǵyndaryna ortalyq dańǵylǵa Nursultan Nazarbaev esimin berý týraly sheshim qabyldaǵany úshin alǵysyn bildirdi.