Aqtaýdaǵy kásibı boks keshine qatysýshylar salmaq ólshedi

AQTAÝ. QazAqparat – Búgin Aqtaýda kásibı boks keshi ótedi. Onyń aıasynda qazaqstandyq Bekzad Nurdáýletov (2-0, 1KO) profıdegi úshinshi jekpe-jegin ótkizedi, dep habarlaıdy QazAqparat Qazaqstannyń kásibı boksy paraqshasyna silteme jasap.

Nurdáýletov ózbekstandyq Farrýh Djýraevpen (6-4-1, 2KO) judyryqtasady. Jartylaı aýyr salmaqtaǵy kezdesý segiz raýndqa eseptelgen.

Sondaı-aq osy boks keshinde orta salmaqtaǵy Meıirim Nursultanov (14-0, 8KO) pen belarýs Dmıtrıı Atrohov (16-11, 7KO) kúsh synasady. Budan bólek, birqatar qazaqstandyq boksshy alǵash ret kásibı rıngke shyǵady.

Barlyq boksshylar salmaq ólsheý rásimine qatysyp, belgilengen lımıtten asqan joq. Keshti uıymdastyrýshy – Adal Promotions kompanııasy. Kesh búgin saǵat 19.00-de bastalady jáne tikeleı efırden kórsetiledi.