Aqtaýdaǵy búkil mektepter men balabaqshalarda jylý máselesi sheshildi

AQTAÝ.QazAqparat - Aqtaý mektepterinde jylýǵa qatysty tıisti jumys júrgizilip, másele sheshildi. Bul týraly Mańǵystaý oblystyq ákimdiginiń baspasóz qyzmetinen málim etti, dep habarlaıdy QazAqparat tilshisi.

Oblys ortalyǵyndaǵy áleýmettik nysandardyń jylý toraptary jylý júıesine qosyldy.

Temperatýra kestesine sáıkes, búgin qalaǵa berilgen temperatýra 101 gradýs boldy.

Búgingi tańda 5 mektep jáne bir ​​mektepke deıingi bilim nysanynyń keıbir bloktaryndaǵy aqaýlardy qalypqa keltirý jumysy júrgizilip jatyr.

«Belgili bolǵandaı, mektepterde jaýapty qyzmet kórsetýshi mekeme tıisti retteý jumysyn júrgizbegen. Degenmen saǵat 17:30-da jumys júrgizilip, barlyq oqý oryndarynda jylý máselesi sheshildi» delingen baspasóz málimetinde.

Jaýaptylar áleýmettik nysandardaǵy jylý deńgeıin tekserdi.

Aqtaý qalasynyń ákimi Erbol Іzbergenov týyndaǵan máseleni sheshý maqsatynda tıisti mamandarǵa tapsyrma berdi.

Eske sala keteıik, búgin Aqtaýda oqýshylar sabaqty jarty saǵattan oqydy. Buǵan oqý kabınetteriniń salqyndyǵy sebep bolǵan.

Al keshe Aqtaýda jylý turaqty berilýi úshin ystyq sý óshirilgen bolatyn.