Aqtaýdaǵy aýyz sýdyń tapshylyǵyna zaýyttardaǵy apatty jaǵdaılar sebep bolǵan

<p>AQTAÝ. KAZINFORM &ndash; Aqtaý qalasynyń turǵyndary 5 kúnnen beri aýyz sý tapshylyǵyn kórýde. 16-shaǵyn aýdannan bastap 35-shaǵyn aýdanǵa deıingi aralyqta jáne Shyǵys shaǵyn aýdandaryna beriletin sýdyń qysymy tómen. Sonyń saldarynan keıbir turǵyn úılerdiń joǵarǵy qabattaryna aýyz sý kóterilmeı jatyr. Keshe 19-shaǵyn aýdannyń turǵyndary 3 kúnnen beri <a href="https://kaz.inform.kz/news/ush-kunnen-ber-susiz-otir-aktauda-turgindar-zholdi-zhauip-auiz-su-berud-talap-ett-528e5f/" target="_blank" rel="noopener">aýyz sýsyz qalǵandaryn</a> aıtyp, jınalǵan edi.&nbsp;</p>

Aqtaý qalasynyń ákimi Ulyqbek Tnálıev jýrnalısterge brıfıng ótkizip, aýyz sýǵa qatysty ahýaldy málimdedi. Shahar basshysynyń aıtýynsha, másele tek atalǵan shaǵyn aýdandarǵa qatysty. Qalanyń basqa bóliginde aýyz sý tapshylyǵy joq. Ákimniń sózinshe, sońǵy 5 kúnde 5 apat bolǵan. Soǵan baılanysty «TsÝVS-4» sý jınaıtyn ortalyqqa keletin sýdyń kólemi azaıyp ketti. Sondyqtan sýdyń qysymy tómendetilgen. 

Foto: Mańǵystaý oblystyq qoǵamdyq kommýnıkatsııa ortalyǵy

– Aqshuqyr aýylynda ornalasqan Aqtaý sý tuşytý zaýytynda 2 nasos isten shyqty. Onyń bireýin túnde qaıta qosty. Ekinshisin de qosýǵa jumystanyp jatyr. Ekinshi jaǵdaı, Kaspıı sý tuşytý zaýytynda transformator isten shyqty. Mine, osy eki zaýyttan keletin sýdyń kólemi azaıdy. Oǵan qosa, taǵy bir másele ózderińiz biletindeı, Aqtaýda tek Kaspıı teńiziniń sýy tuşytylyp, halyqqa beriledi. Kún ysyp, teńiz sýynyń temperatýrasy kóterilgesin, «MAEK» kásipornynyń aýyz sý óndirý kólemi tómendep ketti. Sebebi, olar sýdy muzdatyp, sodan soń tuşytady. Onyń ústine jaz bastalǵaly aýyz sýdy tutyný kólemi 2 ese artty, - deıdi qala ákimi Ulyqbek Tnálıev. 

Qala ákiminiń aıtýynsha, aqtaýlyqtar qys mezgilinde táýligine 32 myń tekshe metr sý tutynady. Al jazda suranys 52 myń tekshe metr. Demek, qazir shaharǵa 20-25 myń tekshe metr sý jetpeı otyr. Resmı málimetterge súıensek, 2015-jyly Aqtaýda 186 myń turǵyn bolǵan. Al, qazir 284 myń adam turady. Oǵan qosa, jazda Aqtaýǵa 400 myńǵa jýyq týrıst keledi. Sol sebepti qalanyń sýmen qamtý jelilerine úlken salmaq túsip tur.

Onyń ústine Aqtaýdyń ınfraqurylymy tozǵan. Onyń ishinde sý jelileri 88 paıyzǵa eskirgen. Shahar basshysynyń sózinshe, ınfraqurylymdy jańartýdyń arnaıy jobasy qabyldanyp, jumystar bastaldy. Al, aýyz sý tapshylyǵyn boldyrmaý maqsatynda birneshe joba júzege asyp jatqanyn jetkizdi. Eske salsaq, buǵan deıin bul týraly jazǵan edik. 

Sondaı-aq Aqtaý qalasynda kólik jýý ortalyqtarynyń ıelerine aýyz sýdy únemdeý úshin, 08-00 men 13-00 aralyǵynda qyzmet kórsetý usynylǵan. Qala ákiminiń sózinshe, 1 apta kóleminde aqaýlar joıylyp, aýyz sýdyń qysymy kóteriledi.