Aqtaýda jyl basynan beri 1 598 jup neke qıdyrǵan

AQTAÝ. QazAqparat - Otbasy kúni Aqtaý qalasynda jańadan otaý qurǵan 7 erli-zaıyptyǵa saltanatty túrde neke kýáligi tapsyryldy, dep habarlaıdy QazAqparat.

Neke qııý kýáligin tapsyrý saltanatyna qala ákiminiń orynbasary Ábilqaıyr Baıpaqov qatysty.

«Sizderdi zańdy nekelerińizben quttyqtaımyn. Jyl basynan beri Aqtaýda 1 598 jup neke qıdyrdy. Bir-birińizdi qurmetteńizder. Sizderge zor densaýlyq jáne kópbalaly ata-ana bolýdy tileımin», - dedi Ábilqaıyr Baıpaqov.

Qalalyq AHAT bóliminiń málimetinshe, bir kúnde 33 jas jubaı neke qıǵan.

Esterińizge sala keteıik, Qazaqstanda qyrkúıektiń árbir ekinshi jeksenbisi Otbasy kúni atap ótiledi. Bıyl bul kún 11 qyrkúıekte tuspa-tus keldi.