Aqtaýda júzdegen turǵyn 25 jyldan beri jylýsyz otyr

<p>Aqtaýdyń qaq ortasynda júzdegen turǵyn 25 jyl boıy jylýsyz kúneltip keledi. 35 otbasy turatyn turǵyn úı ortalyqtandyrylǵan jylý júıesine múlde qosylmaǵan, dep habarlaıdy <a href="Kazinform" target="_blank" rel="noopener">Kazinform</a>.</p>

Mundaǵy turǵyndar baspanalaryn elektr peshimen jylytyp otyr. Al tamaq pisirý úshin gaz ballon tasıdy. «Munyń qaýipti ekenin bilemiz, alaıda basqa shara qalmady» deıdi olar.

- Árqaısymyzdyń úıimizde eki-úshten gaz ballon bar. Biz 1998 jyldan beri jylý degendi umyttyq. Buryn bir jerde qubyr jarylǵan, sodan keıin jylý jetkizýshi mekemege de, ákimge de bardyq. Olar bizdiń eshqandaı qatysymyz joq dep basyn alyp qashady, - deıdi turǵynnyń biri Janáli Esjan aqsaqal.

Elektr peshimen jylynyp otyrǵan ár otbasy aı saıyn 50 myń teńgeden astam aqsha tóleıdi. Jaryqtyń da únemi óshetinine shaǵymdanǵan turǵyndar balalarymyz aýyryp qala ma dep alańdaıdy.

- Páter ishi salqyn, balalarymyz bir bólmege tyǵylyp otyrady. Eki aılyq balam aýyryp qala ma dep ýaıymdap júrmin. Shatyrdan sý ótip tur. Ony kóship kelgende óz qarajatymyzǵa jóndetip aldyq. Mine, bıyl ákimdikke úshinshi márte bardym. Máselemiz sheshiler emes, Aqtaýdyń ákimi kelip, jaǵdaıymyzdy óz kózimen kórse eken, - deıdi Hýrlıma ıÝsýpova.

Bul úı 1987 jyly óńirdegi zaýyt qyzmetkerleri úshin salynǵan. Áý basta jataqhana retinde berilgen nysan keıin turǵyndardyń atyna zańdastyrylǵan. Ákimdiktiń de menshigine jatpaıtyn úıge endigi jylý júrgizýdiń ózi úlken másele bolyp otyr. Mamandar bul nysan jeke turǵyn úı retinde rásimdelgendikten, páterlerge jylý júrgizý qıynǵa soǵyp turǵanyn aıtady.

- Jylý qubyry úıdiń jertólesine kelip tur. Alaıda bul páterler jekemenshik. Sondyqtan jylý júıesin tartý jumysy «Qaıtarymdy qarajat» memlekettik baǵdarlama esebinen júrgiziledi. Qazir úı tehnıkalyq saraptamadan ótip tur. Saraptama boıynsha úıge kúrdeli jóndeý qajet degen qorytyndy alyndy. Jobalyq-smetalyq qujattama daıyn bolǵannan keıin qarajat bólýge ruqsat beriledi. Baǵdarlama negizinde jylý, gaz júıesin, shatyrdy nemese úıdi tolyq jóndeýdi turǵyndardyń ózi tańdaı alady, - dedi Aqtaý qalalyq turǵyn-úı ınspektsııasy bóliminiń basshysy Nuradın Kósherbaev.

Sondaı-aq ákimdiktegiler gaz qubyryn júrgizý úshin tıisti qujattardy rásimdep jatqanyn aıtyp otyr. Keler jyldyń bıýdjetinen qarajat bólinse, bul daýǵa núkte qoıylmaq.