Aqtaýda jol apatynan úsh avtokólik órtenip ketti

AQTAÝ. QazAqparat - Aqtaýda jol-kólik apatynan úsh avtokólik órtenip ketti, dep habarlaıdy QazAqparat tilshisi.

Oblystyq polıtsııa departamentiniń habarlaýynsha, oqıǵa 10 mamyrdan 11 mamyrǵa qaraǵan túni bolǵan.

Departamenttiń baspasóz qyzmeti habarlaǵandaı, «Infiniti» mashınasynyń júrgizýshisi «Toyota Prado» jáne «Vaz-2112» avtokólikterimen soqtyǵysqan.

«Saldarynan barlyq úsh kólik janyp ketti. Zardap shekkender Mańǵystaý oblystyq aýrýhanasyna jetkizildi», - delingen habarlamada.

Aıta keteıik, buǵan deıin Mańǵystaý oblysynda júk kóligi gaz qubyryna soǵylǵanyn jazǵan bolatynbyz.

Ol kezde aýyr tehnıka tıegen arnaıy júk tasymaldaýshy kólik joǵary qysymdy gaz qubyryn soǵyp, 7 metr qashyqtyqqa súırep áketken bolatyn.