Aqtaýda 6 jasar qyz bala qaıtys boldy
Qaıǵyly oqıǵa 15-jeltoqsan kúni bolǵan. Búldirshinniń dene qyzýy kenetten kóterilip, ata-anasy jedel járdem shaqyrǵan. Biraq dárigerler balany aýrýhanaǵa jatqyzýdan bas tartyp, jaqsy bolatynyn aıtyp, ketip qalǵan. Qyz balanyń dene qyzýy qaıta kóterilip, jaǵdaıy nasharlaǵanda ákesi qaıta jedel járdem shaqyrǵanyn aıtady. Alaıda, dál sol brıgada kelip, aýrýhanaǵa jatqyzý máselesin talqylap júrgende bala qaıtys bolǵan.
— Birinshi kelgende jedel járdem qyzmetkerleri balanyń denesin súrtip, antıbıotık berýge keńes berip, ketip qaldy. Olar ketkennen keıin shamamen bir saǵat ótken soń, qyzymnyń óńi aýyp, denesiniń túsi ózgerip ketti. Biz qorqyp, taǵy da jedel járdem shaqyrdyq. Sol eki jas jigit keldi. Olar qyzymnyń qandaı kúıde ekenin kórip, aýrýhanaǵa aparýǵa sheshim qabyldady. Biraq, balany kıindirip, shyǵamyz dep júrgende qol-aıaǵy qurysyp, kóz aldymda aırylyp qaldym. Jedel járdem qyzmetkerlerinde aýa berý apparaty da joq, ózderi eshteńe bilmeıdi. Olar beıne qońyraý shalyp, áriptesterimen sóılesip, ne isteý kerektigin surady, sodan keıin ekinshi brıgadany kómekke shaqyrdy. Alaıda, olar kelgenshe men qyzymnan aıryldym, — deıdi Islam Shyńǵys.
Qaıǵydan qan jutqan ata-ana kinálilerdi jazalap, jedel járdem qyzmetiniń jabdyqtalýyn, qyzmetkerlerdiń biliktiligin qaıta tekserýdi suraıdy.
Mańǵystaý oblystyq densaýlyq saqtaý basqarmasy qaıǵyly oqıǵaǵa qatysty pikir bildirdi.
— Basqarma tarapynan jáne «Mańǵystaý oblystyq jedel jáne shuǵyl medıtsınalyq járdem stantsııasy» oryn alǵan jaǵdaı boıynsha qazirgi ýaqytta ishki-taldaý, tekserý jumystary júrgizilip jatyr. Zańǵa sáıkes qorytyndy sheshim medıtsınalyq saraptamadan keıin jasalady, - delingen habarlamada.
Buǵan deıin, Aqtaýda MAEK mekemesińde jumysshy qaza tapqanyn jazǵan bolatynbyz.