Aqtaýda jazǵy Ýnıversıada saltanatty túrde ashyldy

AQTAÝ. QazAqparat – Aqtaý qalasynda eldegi joǵary oqý oryndardyń stýdentteri arasyndaǵy XII jazǵy Ýnıversıadanyń resmı ashylý saltanaty ótti. «Mańǵystaý-Arena» sport kesheninde myńdaǵan adam jınalyp, shoý baǵdarlamany tamashalady, dep habarlaıdy QazAqparat Ǵylym jáne joǵary bilim mınıstrliginiń feısbýktegi paraqshasyna silteme jasap.

Ýnıversıadaǵa qatysýshy sportshylardyń saltanatty sherýi sahnanyń sánin arttyrdy. Kesh qonaqtaryna «Kemeldikke jetkizer kúsh – bilim men ǵylym!» atty teatrlandyrylǵan qoıylym usynyldy.

Mańǵystaý oblysynyń ákimi Nurlan Noǵaev rásimniń resmı bólimin quttyqtaý sózimen ashyp, qatysýshylarǵa sáttilik tiledi. Ǵylym jáne joǵary bilim vıtse-mınıstri Qýanysh Erǵalıev sóz sóılep, Memleket basshysy men Úkimet tarapynan stýdent jastardy respýblıkalyq jáne halyqaralyq deńgeıdegi sporttyq is-sharalarǵa tartý jumystary qarqyn ala túskenin aıtty. Qazaqstan Respýblıkasynyń Memlekettik Ánurany shyrqalyp, XII jazǵy Ýnıversıada ashyq dep jarııalandy.

Aqtaý ýnıversıadasynyń jeńimpazdary 28 shilde – 8 tamyz aralyǵynda Qytaıda ótetin XXXI Dúnıejúzilik jazǵy Ýnıversıadaǵa jáne 24-29 qyrkúıekte Túrkistanda ótetin II Túrki Ýnıversıadasyna qatysýǵa joldama alady.

Dúnıejúzilik Ýnıversıada Týyn Esenov ýnıversıtetiniń sporttan álem, chempıondary, halyqaralyq dárejedegi sport sheberleri M. Kanalıeva, J. Turaqbaı, N. Ǵalymbekuly, O. Altynbek alyp shyqty. Ýnıversıada jalaýyn kóterý saltanaty erekshe áserli ótti. Merekelik kesh kontserttik baǵdarlamamen jalǵasty.

Ǵylym jáne joǵary bilim mınıstrliginiń qoldaýymen, Yessenov University uıymdastyrýymen alǵash ret Aqtaý qalasynda ótip jatqan XII jazǵy Ýnıversıada oıyndary 24 mamyr kúni bastalǵan bolatyn. Bir aıǵa – 24 maýsymǵa deıin josparlanǵan stýdentter saıysy 17 sport túrinen, 20 jarys boıynsha júrip jatyr. Oǵan elimizdiń 55 ýnıversıtetinen 3000-nan astam stýdent qatysady.

Ýnıversıadanyń jabylý saltanaty 22 maýsym kúnine josparlanǵan.