Aqtaýda «Jasyl úı» aktsııasy bastaldy

AQTAÝ. QazAqparat - Aqtaýda «Jasyl úı» aktsııasy bastaldy. Onyń aıasynda kóppáterli úılerdiń aýlalaryn kógaldandyrýǵa nıet bildirgender 10 kóshet tegin ala alady. Ótinimder 30 naýryzǵa deıin qabyldanady. Bul týraly Aqtaý qalasy ákiminiń baspasóz qyzmetinen málim etti, dep habarlaıdy QazAqparat tilshisi.

«Ekologııalyq aılyq aıasynda Aqtaý qalasynyń ákimdigi «Jasyl úı» aktsııasyn bastaıdy. Endi árbir turǵyn aýlasyna aǵash otyrǵyzyp, kútim jasaı alady. Biz kóshetter berýge daıynbyz. Qalanyń qoǵamdyq oryndaryn ǵana emes, aýlalar men turǵyn úı massıvterin de kógaldandyrý qajet dep sanaımyz. Ár adam ózi otyrǵyzǵan aǵashqa kútimmen qaraıtynyna senimdimiz», - dedi qalalyq TÚKSh bóliminiń basshysy Ǵalymjan Serikbaev.

Aıta ketý kerek, aktsııaǵa qatysýshylar úsh jyl ishinde otyrǵyzylǵan aǵashtarǵa kútim jasaý týraly kepildik mindettemesine qol qoıýy kerek. Instagram/ Facebook resmı betterin belgileý arqyly aǵashtyń jaǵdaıy týraly fotosýretter men beıne esepterdi únemi júkteýi kerek. Aǵash egetin alańdy PIK nemese JEK-pen kelisý qajet bolady.

Qatysý úshin elektrondy mekenjaıǵa ([e-mail]) mynalardy jiberý qajet:

* Ótinish, aty-jóni jáne baılanys derekteri,

* Aǵash otyrǵyzǵysy keletin alań, naqty meken-jaıy,

* Josparlanǵan orynnyń birneshe fotosy.