Aqtaýda jasóspirim kópqabatty eki úıdiń ortasyndaǵy qýysqa túsip ketti

AQTAÝ. QazAqparat - Aqtaýda 17 jastaǵy bala turǵyn úı shatyrynan qulap, kópqabatty eki úıdiń ortasyndaǵy qýysqa túsip ketti, dep habarlaıdy QazAqparat tilshisi.

Oqıǵa 8 qyrkúıek saǵat 22.45-te 16 shaǵyn aýdan 59-úıinde bolǵan.

«2006 jyly týǵan jasóspirim qaýipsiz jerge shyǵarylyp, jedel járdem qyzmetkerlerine tapsyryldy», - dep málim etti Mańǵystaý oblystyq Tótenshe jaǵdaılar departamentiniń baspasóz qyzmetinen.

Jasóspirim qazir oblystyq balalar aýrýhanasynyń jansaqtaý bóliminde aýyr jaǵdaıda jatyr.

Kýágerlerdiń aıtýynsha, jasóspirim dostarymen birge qurylysy aıaqtalmaǵan úıdiń shatyrynda oınap júrgen. Sol ýaqytta eki kópqabatty úıdiń ortasyna bekitilgen penoplast plıta synyp, bala qýysqa túsip ketken.

«Adal» turǵyn úı kesheniniń qurylysyn salýshy – «Interer Stroı Aktaý» seriktestigi. Úıdiń qurylysy 2020 jyly bastalǵan, 7 qabat, 4 kireberisten turady. Áli paıdalanýǵa berilmegen. Polıtsııa bul oqıǵaǵa qatysty is qozǵady», - delingen Aqtaý qalasy ákimdiginiń baspasóz qyzmetiniń málimetinde.

Oqıǵa boıynsha qylmystyq is qozǵalǵan.