Aqtaýda jas mamandarǵa arnalǵan jataqhana paıdalanýǵa berildi
Aqtaý qalasy 31 B shaǵyn aýdany 25-úıde ornalasqan jańa ǵımaratta basqa aýdan, qalalardan kelip jumys isteıtin jastar tura alady.
Bul úı shalǵaı aýdanda turatyn, «Jańa serpin» baǵdarlamasy aıasynda jumyspen qamtylǵan azamattar úshin qarastyrylǵan. Budan bólek, dáriger, muǵalim sııaqty oblys ortalyǵynda tapshy maman ıeleriniń osy jerge ornalasýyna múmkindik bar.
«Aqtaý qalasynda turǵyn úı alý tiziminde 5 myńnan astam adam kezekte tur. Sol sebepti bul jataqhananyń ashylýy turǵyn úı naryǵyndaǵy jaǵdaıdy jaqsartýǵa óz septigin tıgizetin bolady. Jas mamandar páterge qol jetkizgenge deıin jataqhanada tegin turyp, alańsyz eńbek etýine jaǵdaı jasalyp otyr», - dedi Mańǵystaý oblysy ákimi Eraly Toǵjanov.
Qurylys dırektory Nurlan Nyǵmetovtyń aıtýy boıynsha, jataqhana qurylysyna 580 mıllıon teńge shamasynda qarjy ketken. Byltyr aqpan aıynda bastalǵan úı 1,5 jyl ishinde salynyp bitken.
«NKOK» (NortKaspıanOpereıtıngKompanı- red.) kompanııasynyń qarjylandyrýymen salynǵan jataqhanany jastar úıi dep te ataýǵa bolady. Otbasyly azamattarǵa páter retinde 25 oryn qarastyrylsa, 85 oryn jeke azamattardiki. Bir bólmede 2,3 adam birigip turady. Al otbasyly azamattardyń bólmesi jeke páterdiń jaǵdaıynan kem emes. Munda arnaıy medıtsına kabıneti, jattyqtyrý zaly, konferentsııa zaly bar», - deıdi Aqtaý qalasynyń ákimi Serikbaı Trumov.
Aıta ketý kerek, jataqhanada turý úshin jas mamandar tek kommýnaldyq tólemaqy tóleıdi.
Konstıtýtsııa kúni qarsańynda «Shyǵys» turǵyn úı alabynda jastar úshin taǵy 500 oryndyq jataqhana paıdalanýǵa berilmek.
Aıgúl DÁDEN