Aqtaýda zeınetaqy qoryndaǵy jınaǵyn aqshalaı alyp beremin dep 16 adamdy aldaǵan alaıaq ustaldy

AQTAÝ.QazAqparat - Aqtaýda 16 turǵynnan 22 mln teńge alǵan alaıaq ustaldy. Ol adamdardy zeınetaqy qoryndaǵy jınaǵyn aqshalaı alyp beremin jáne munaı kompanııalaryna jumysqa turǵyzamyn dep sendirgen. Bul týraly Mańǵystaý oblystyq Polıtsııa departamentiniń baspasóz qyzmetinen málim etti, dep habarlaıdy QazAqparat tilshisi.

Ózin «Meıirbek» dep tanystyryp kelgen Qaraǵandy oblysynyń turǵyny 46 jastaǵy áıel bolyp shyqty.

«Aqtaý qalasy Polıtsııa basqarmasy qyzmetkerlerimen jedel izdestirý nátıjesinde 46 jastaǵy áıel adam ustalyp, qamaýǵa alyndy. Qazir atalǵan derek boıynsha QR Qylmystyq kodeksiniń 190-baby 3-bóligi 4- tarmaǵymen birneshe ret alaıaqtyq boıynsha sotqa deıingi tergeý jumystary júrgizilip jatyr» delingen baspasóz málimetinde.