Aqtaýda zańsyz salynǵan 107 qurylys nysanynyń ıesi jaýapqa tartyldy
Tekserý qorytyndysy boıynsha Aqtaý qalasynda 107 zańsyz qurylys, ıaǵnı ýákiletti organnyń tıisti ruqsaty berilmegen nysan anyqtalyp, 67 mln teńge aıyppul salyndy.
«Ruqsat qujattary bolmaǵandyqtan, 107 zańsyz qurylys nysany ıesi jaýapkershilikke tartyldy. Ýákiletti organ zań buzýshylyqtardy joıý týraly nusqama engizdi», - deıdi oblystyq prokýratýranyń basqarma basshysy Mergen Meńdiǵalıev.
Brıfıngide úleskerlerdiń máseleleri de kóterildi. Zań boıynsha qurylys salýshylar ákimdikten úleskerlerden qarajat tartýǵa ruqsat alýy kerek.
«Biraq, olar zańnyń bul protsedýralaryn aınalyp ótken. Biz azamattarǵa túsindirip kelemiz. Alaıda, kóp adam elemeıdi, qaýip-qaterge basyn tigip, kelisimsharttar jasaıdy», - deıdi oblys prokýrory Rýfat Quttykov.
Úleskerlerdiń aqshalaı qarajatyn zańsyz tartýdyń 6 faktisi anyqtalǵan. Kompanııalar zań aıasynda tıisti ruqsat almasa da, turǵyndarmen kelisim jasasqan. Olarǵa 5,2 mıllıon teńge ákimshilik aıyppul salyndy.
«Qurylys salýshylar naqty úsh qujat berýi qajet. Birinshisi – úleskerlerdiń qarajatyn tartýǵa ákimdik ruqsat bergeni jóninde. Jospar boıynsha 9 qabatty salý kerek bolsa, aldymen sony salý kerek, sosyn ákimdik úleskerlerdiń qarajatyn tartýǵa ruqsat beredi. Ekinshi qujat – Qazaqstan Respýblıkasynyń kepildik berý qorynyń ruqsaty. Al úshinshisi – ekinshi deńgeıli bankterdiń ruqsaty», - deıdi oblys prokýrorynyń orynbasary Erjan Turmaǵambetov.
Sonymen qatar, oblys ortalyǵynda zańsyz salynǵan nysandardy buzý jóninde sotqa 12 talap-aryz túsken. Qazir Bas prokýratýranyń tapsyrmasymen tekserý júrgizilip jatyr.