Aqtaýda zańsyz 10 onlaın-kazıno jabyldy

ASTANA. QazAqparat - Mańǵystaý oblystyq memlekettik kirister departamentinde uıymdasqan transulttyq qylmysqa qarsy kúres máselesi kóterildi, dep habarlaıdy QazAqparat tumba.kz saıtyna silteme jasap.

Kásipkerlik, qoǵamdyq birlesikter, quqyq qorǵaý organdarynyń ókilderi qatysqan sharada Ekonomıkalyq tergeý qyzmetiniń (ETQ) osyndaı qylmystarǵa qarsy júrgizip jatqan jumystaryna qatysty mańyzdy aspektileri talqylandy.

Kezdesýde Grýzııa azamaty bastaǵan uıymdasqan qylmystyq toptyń áreketi áshkerelengeni aıtyldy. Olar birneshe jyl boıy oblys aýmaǵynda zańsyz qumar oıyn bıznesimen aınalysqan.

Budan bólek, sońǵy jedel-izdestirý is-sharalaryn júrgizý barysynda «onlaın-kazıno» oıyny júrgizilgen on núkte jabylǵan. Úsh adam tutqyndalyp, 188 oıyn quraldary tárkilengen. 25 epızod boıynsha is sotqa joldanǵan.

«Qylmystyq kodekste MKQ quqyq qorǵaý bólimshesiniń quzyretine  qatysty 50 bap bar. Onyń ishindegi 24 bapta «qylmystyq top» jasaǵan belgiler atap ótilgen. Bul - kóptegen ekonomıkalyq qylmystardyń uıymdasqan ádispen jasalatynyn kórsetedi», - dedi ETQ basqarmasynyń basshysy Ómirserik Tajmaǵanbetova.

Sondaı-aq, ol uıymdasqan qylmysty qarjylandyrý faktilerin anyqtaý jáne jolyn kesý boıynsha sharalardy iske asyrýdyń mańyzdylyǵyna nazar aýdardy. Uıymdasqan qylmystyń zamanaýı úrdisteriniń biri - onyń qyzmetin zańdastyrý, ıaǵnı qylmystyq jolmen alynǵan qarajattarmen ınvestıtsııalaý arqyly zańdy kásiporyndardy qurý.

Kezdesýge qatysýshylar keńirek pikir, tájirıbe almasty jáne qoldanystaǵy zańnamany damytý boıynga birqatar usynystar aıtyldy.