Aqtaýda Ulttyq ulan qataryn 200-den astam sarbaz tolyqtyrdy

NUR-SULTAN. QazAqparat – QR Ulttyq ulany «Batys» óńirlik qolbasshylyǵyna qarasty 6656-áskerı bóliminde 200-den astam sarbaz saltanatty túrde ant berdi, dep habarlaıdy QazAqparat tilshisi.

«Batys» óńirlik qolbasshylyǵy baspasóz qyzmetiniń jetekshisi, podpolkovnık Erbolat Sultanov málim etkendeı, Ulttyq ulan qataryn tolyqtyrǵandar Aqtóbe, Túrkistan, Batys Qazaqstan jáne Atyraý oblystarynan shaqyrylǵan.

Óńirdegi sanıtarlyq-epıdemıologııalyq ahýalǵa sáıkes ant berý rásimi karantındik talaptarǵa sáıkes ótkizildi.

Saltanatty jıynda 6656-áskerı bóliminiń komandıri, podpolkovnık Marat Rahpanov jańadan kelgenderdiń óz áskerı boryshtaryn adal atqaratynyna senim bildirdi.

Mańǵystaý oblysynyń ákimi Nurlan Noǵaev Ulttyq ulan jaýyngerlerin ómirlerindegi mańyzdy oqıǵamen quttyqtap, el senimin aqtaýǵa shaqyrdy.

«Qoǵamdaǵy qaýipsizdik pen turaqtylyqty, eldegi beıbitshilik pen tynyshtyqty qamtamasyz ete otyryp, sarbazdar Qazaqstannyń odan ári damýyna óz úlesterin qosady. Aǵa býynnyń erligi men áskerı dástúrinen úlgi ala otyryp, Memleket basshysy qoıǵan tapsyrma-mindetterdi adal oryndaý – basty mindet», dedi óńir basshysy.

«Biz Otanymyzdyń laıyqty qorǵaýshylary bolýǵa ýáde beremiz. Bir-birimizge járdemdesip, turmysta da, oqýda da qoldaıtyn bolamyz. Bir jyl kóp ýaqyt emes. Osy merzimde ózimizdiń úzdik qasıetterimizdi kórsetip úlgerýge tyrysamyz», dedi Aqtóbe qalasynan shaqyrylǵan qatardaǵy jaýynger Bolat Orazov.

Eske sala keteıik, budan buryn Oralda 200-den astam sarbazdyń ant qabyldaǵanyn jazǵan bolatynbyz.