Aqtaýda teńiz jaǵasyndaǵy jartastyń bir bóligi opyrylyp tústi

<p>AQTAÝ. KAZINFORM - Aqtaýda Kaspıı teńizi jaǵalaýyndaǵy jaıaý júrginshilerge arnalǵan soqpaq joldyń boıyndaǵy jartastyń joǵary bóligi qulady. Oqystan bolǵan oqıǵaǵadan eshkim zardap shekpegen.&nbsp;</p>

Áleýmettik jelide atalǵan jaǵdaıdyń vıdeosy tarady.

Onda jartastyń joǵary bóliginiń edáýir bóligi opyrylyp, jolǵa qulaǵany anyq kórinedi.

Buǵan qatysty Aqtaý qalalyq turǵyn úı-kommýnaldyq sharýashylyq bóliminiń basshylyǵy pikir bildirip, jaǵdaıdyń qanshalyqty qaýipti ekenin aıtty. 

Foto: Jankeldi Qarjan

«2023 jyldyń jeltoqsan aıynda jartas etegindegi soqpaq joldar boıynsha konkýrs jarııalanǵan edi. Biraq ishki memlekettik aýdıt tarapynan qarsylyq bolǵan soń atalǵan konkýrs ýaqytsha toqtatyldy. Jospar boıynsha aldaǵy aıda ashyq konkýrs jarııalanady dep kútilip otyr. Aqtaýdy abattandyrýmen aınalysatyn merdiger kompanııa jartastaǵy soqpaq joldardy kútip-baptaýǵa jaýapty bolmaq. Sonymen birge, merdigerler jartastaǵy jaıaý júrginshiler jolyn jaryqtandyrýǵa mindetteledi. Oqys oqıǵa bolǵan jer qorshaýǵa alynyp, adamdardyń ótýine shekteý qoıyldy. Sondaı-aq, qaýipti jartasty aınalyp ótetin jol bar. Alda konkýrs aıaqtalǵan soń jaýapty merdiger qaýipti jartas aýmaqtaryn qorshaıdy», - dedi Aqtaý qalalyq TÚKSh bólim basshysynyń orynbasary Baqtııar Maqsat.

Foto: Jankeldi Qarjan

Aqtaý qalasynda teńiz jaǵalaýyndaǵy jartas joly 2017-2018 jyldary salynǵan. 

Óńirde munaı óndirýshi kompanııalardyń demeýshiligimen ornatylǵan aspaly soqpaq joldar keıin turǵyndar serýendeıtin orynǵa aınalyp úlgerdi.

Foto: Jankeldi Qarjan

Soqpaqty jartas paıdalanýǵa berilgeli mundaı oqys jaǵdaılar birneshe ret bolǵan.

Oqıǵa kezinde zardap shekkender tirkelgen joq.