Aqtaýda teńiz betinde maıly qara daq paıda boldy

<p>AQTAÝ. KAZINFORM - Mańǵystaýda Kaspıı teńiziniń jaǵalaýy aýmaǵyndaǵy sý betinen qara daqtar baıqaldy.</p>

Atalǵan máseleni Mańǵystaý oblysy boıynsha Ekologııa departamenti baqylaýǵa alyp, tıisti jumystar bastalǵanyn málimdedi.

«Mańǵystaý oblystyq Ekologııa departamenti Aqtaý qalasy jáne Qyzylqum jeriniń ońtústik-batys baǵytyna qaraı Kaspıı teńizindegi paıda bolýy kúmándi qara tústi núkteler boıynsha is-sharalardy qabyldaý jumystaryn júrgizip jatyr. Sholý kezinde Aqtaýdaǵy 14 shaǵyn aýdannyń teńiz jaǵalaýy tolyqtaı tekserilip, sýdan synama alyndy. Sholý kezinde teńiz sýynyń taza ekendigi, jaǵalaýda maı daqtary jáne jaǵymsyz maı ıisi anyqtalǵan joq. Synama qorytyndysy boıynsha zııandy zattekterdiń shamadan tys artýy tirkelmedi», - dedi departament ókilderi.

Ekologııa jáne tabıǵı resýrstar vıtse-mınıstri Jomart Álıev Kaspıı teńiziniń Qazaqstanǵa tıesili bóliginde eki daq baıqalǵanyn aıtty.

«...Barshańyz túsinesizder dep oılaımyn, Aqtaý qalasyna jaqyn jerde teńiz porty bar. Sol portqa reıdpen keletin kemelerden ruqsatsyz shyǵaryndy tastalýy múmkin», - dedi Úkimet otyrysynan keıin BAQ ókiliniń saýalyna bergen jaýabynda.

Jomart Álıev sheteldik kemelerdi tekserýge vedomstvonyń quzyreti joq ekenin atap ótti.

Buǵan deıin Mańǵystaý oblystyq Ekologııa departamenti Rixos qonaqúıine tekseris nátıejesinde aıyppul salǵan bolatyn. Sonymen birge, el Úkimeti Kaspıı teńiziniń ǵylymı-zertteý ınstıtýtyn qurý týraly qaýlyny bekitken edi.