Aqtaýda teńiz jaǵasynda dezınfektsııa jumystary júrgizilýde

AQTAÝ. QazAqparat - Qala ákimdiginiń tapsyrmasymen Kaspıı teńiziniń jaǵalaýynda dezınfektsııa jumystary júrgizildi, dep habarlaıdy QazAqparat tilshisi.

Búgin 15-shaǵynaýdandaǵy amfıteatr janynan bastap dezınfektsııa jumystary bastaldy. Jaǵalaýdaǵy otyrǵyshtar, balalar oıyn alańdary men jattyǵý quraldary tazalandy.

Erteń áskerı bólimniń qatysýymen taǵy da dezınfektsııa jumysy «Yntymaq» alańy men «Máńgilik alaý» monýmentinde júrgiziledi.

Sonymen qatar, qala ákimdiginiń qyzmetkerleri qala turǵyndaryna saqtyq sharalary jóninde túsindirý jumystaryn júrgizip jatyr. Koronovırýs ınfektsııasynyń taralýyna jol bermeý sharalaryn nazarǵa alý maqsatynda arnaıy kólikterge daýys zoraıtqysh ornatylǵan. Qurylǵyda eki tilde (memlekettik jáne orys) qajetti qaýipsizdik sharalary týraly aqparat jarııalanady.