Aqtaýda teńiz jaǵalaýyndaǵy zańsyz kásipkerlikti toqtatý jumystary bastaldy
Ákimdik qyzmetkerleri men kommýnaldyq mekemeler birlesip, 9 A, 14 A jáne 15 A shaǵyn aýdandary tusyndaǵy teńiz jaǵalaýynda balalarǵa arnalǵan batýttar men velosıped, oıyn mashınalary sııaqty qozǵalys quraldaryn alyp tastaý jumystaryn bastady.
«Biz birneshe ret zańsyz pavılondardy alyp tastaý, sondaı-aq balalar oınaıtyn attraktsıondardy jaǵalaýdan shyǵarý týraly jazbasha eskertýler berdik. Alaıda, kásipkerler zańǵa baǵynbaı, jumystaryn jalǵastyra berdi. Qazir zań aıasynda pavılondar men ózge de qural-jabdyqtardy alyp tastaý jumystary bastaldy. Bul zańsyz áreket jaǵalaýdyń kórkin buzyp qana qoımaı, qaýipsizdikke de áser etedi. Óıtkeni, bul kásipkerler balalardyń qaýipsizdigine jaýap bermeıdi», - deıdi Aqtaý qalasy ákiminiń orynbasary Erbol Jumaǵazın.
Mamandardyń aıtýynsha, búginde jaǵalaýda shamamen 35 kásipker zańsyz jumys isteıdi. Mereke kezinde bul kórsetkish 55-ke jetedi.
«Qala turǵyndary arasynda saýalnama júrgizildi. Nátıjesinde halyqtyń basym bóligi teńiz jaǵalaýyndaǵy kásipkerlikke qarsy ekeni anyqtaldy. Bul oryndarda kásip júrgizip kelgen tulǵalarǵa usynys retinde «Aqbota» saıabaǵy men buryn memorandým jasalǵan saýda bazarlarynyń aýmaǵyna kóshý usynyldy», - dedi E. Jumaǵazın.