Aqtaýda tarıhı-mádenı muralardy qorǵaýǵa arnalǵan otyrys ótti
Alqaly jıyn Elbasynyń «Rýhanı jańǵyrý» baǵdarlamasy aıasynda uıymdastyrylyp otyr, dep habarlaıdy óńir basshysynyń baspasóz qyzmeti.
Memleket basshysy óz joldaýynda: «Ulttyq salt-dástúrlerimiz, tilimiz ben mýzykamyz, tarıhymyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis» degen bolatyn.
Oblys ákimi Eraly Toǵjanov tóraǵalyq etken jıynǵa Astana, Almaty qalasynan arnaıy kelgen Sádýaqas Aǵytaev, Dmıtrıı Voıakın, Zeınolla Samashev, Islam Jemeneı, Aqan Ońǵaruly sııaqty arhelog, tarıhshylar qatysty.
Keńestiń maqsaty - tarıhı-mádenı murany qorǵaý jáne paıdalaný máselelerin sheshýge belsendi yqpal etý. Tarıhı-mádenı murany qorǵaý jáne paıdalaný máseleleri boıynsha ǵylymı-zertteý jumystarynyń ǵylymı mańyzdy deńgeıin kóterý. Arheologııa men etnografııa, tarıhı-mádenı eskertkishterdi zertteýdiń ǵylymı logıkalyq júıesin anyqtaý. Uıymdastyrýshylardyń aıtýynsha, keńes 2007 jyldan beri jyl saıyn dástúrli túrde ótkizilip keledi. Búgingi basqosýda oblys aýmaǵyndaǵy tarıhı-mádenı muralardy saqtaý men qorǵaý salasyndaǵy atqarylǵan jumystardyń esebi tyńdalyp, olardyń saqtalýy boıynsha aldaǵy mindetterin aıqyndady. Sonymen qatar, zerttelgen dúnıelerdi nasıhattaýdyń ózekti máselesi talqylandy.
«Qazrestavratsııa» respýblıkalyq memlekettik kásipornynyń mamany Sádýaqas Aǵytaev «Ǵylymı-restavratsııalaý jumystarynyń sapasyn jetildirý týraly», QR Ulttyq mýzeıiniń «Halyq qazynasy» ǵylymı zertteý ınstıtýtynyń basshysy, tarıh ǵylymdarynyń kandıdaty Aqan Ońǵaruly «Ústirt pen Mańǵystaýdaǵy ejelgi ǵıbadathanalar men ortaǵasyrlyq beldeýli kerýen-saraıy: jańa zertteýler men máseleler», «Nur-Múbárak» Egıpet ıslam mádenıeti ýnıversıteti, «Ábý-Hanıfa» ortalyǵynyń jetekshi ǵalymy, fılologııa ǵylymdarynyń doktory, professor Islam Jemeneı «Rýhanı jańǵyrý: Tarıhı sana» taqyryptarynda baıandama oqydy.
2007 jyly irgesi qalanǵan Keńestiń quramyna tarıh jáne arheologııa, etnografııa, sáýlet, qala qurylys máselelerin biletin bilim men biliktilikke ıe ǵalym, sáýletshi, mádenıet jáne óner ókilderi kiredi.