Aqtaýda stýdenttik jataqhana paıdalanýǵa berildi

AQTAÝ. QazAqparat - Aqtaýda 210 oryndyq úsh qabatty jataqhana paıdalanýǵa berildi. Ǵımaratta Óner, Kólik jáne Energetıkalyq kolledjderdiń stýdentteri ornalasady, dep habarlaıdy QazAqparat tilshisi.

Jataqhananyń kúrdeli jóndeý jumystary 2018 jyldyń jeltoqsanynda aıaqtalǵan. Іshi keń ári taza, zamanaýı jıhazdarmen jabdyqtalǵan. Oqý zaly men demalys bólmeleri bar. Internet jelisine qosylǵan. Endi kovorkıng ortalyǵy ashylmaq.

«Ótken jyly Elbasy árbir oblysta jataqhana ashý týraly tapsyrma bergen bolatyn. Aldaǵy bir-eki jylda osyndaı jataqhanamen 2600 stýdentti qamtamasyz etpekpiz. 210 oryndyq jataqhana solardyń alǵashqysy», - dedi jataqhananyń ashylý sharasynda oblys ákimi Eraly Toǵjanov.

Jataqhanaǵa qonystanǵan óner kolledjiniń stýdenti Aınur Jumabaeva Jańaózen qalasynyń týmasy. Buǵan deıin ol páter jaldap kelgen.

«Óte qýanyshtymyn. Іshi keremet. Bul sátti qanshama stýdent asyǵa kútti. Eki jyl boıy páter jaldap turdyq. Stýdent bolǵandyqtan bul qıynǵa soǵady»,-deıdi ol.

Jalpy, qala boıynsha myńnan asa kolledj stýdenti jataqhanaǵa zárý.

«Jyl ishinde 670 jasty baspanamen qamtamasyz etemiz. Jergilikti bıýdjet esebinen 300 orynǵa stýdentterdi ornalastyramyz. Ózimizdiń balanstan - 160, qosymsha kózderden 400 oryn daıyndap otyrmyz», - deıdi Mańǵystaý oblystyq Bilim basqarmasy basshysynyń orynbasary Nurlybek Qoıjanov.

Budan bólek, 2 kolledj janynan 800 orynǵa deıingi jataqhana jáne 17-shaǵynaýdannan 500 orynǵa arnalǵan jataqhana salý josparlanyp otyr. Osylaısha, kolledj stýdentteri 2021 jyly baspanamen júz paıyz qamtylmaq.