Aqtaýda soǵys ardageri Qaıyr Qydyrbaevtyń qurmetine eskertkish taqta ornatyldy

AQTAÝ. QazAqparat - Aqtaýda qalanyń qurmetti azamaty, Ekinshi dúnıejúzilik soǵystyń ardageri Qaıyr Hydyrbaevtyń turǵan úıine eskertkish taqta ornatý saltanatty is-sharasy ótti, dep habarlaıdy QazAqparat tilshisi.

Qaıyr Hydyrbaev 1920 jyly Mańǵystaý oblysynda týyp, 1941 jyly soǵysqa attanǵan. 2-Belarýs maıdany quramynda bolyp, Ýkraınanyń birqatar qalalaryn jaýdan azat etken. 1945 jyldyń 25 sáýirinde Germanııanyń Meklenbýrg provıntsııasynda Anklam, Noıbrandenbýrg, Frıdland qalalaryn jaýdan azat etý kezinde basynan aýyr jaraqat alyp, bir kózinen aırylǵan. Jeńis kúnin Berlındegi dala gospıtalinde qarsy alyp, elge 1946 jyly oralǵan.

«Jeńis kúni qarsańynda ákemniń qurmetine eskertkish taqta ornatylyp jatyr. Osy saltanatty is-sharaǵa kelgen árbir janǵa alǵys aıtamyn. Ákemdi syılap, onyń ulaǵatty ǵumyryn úlgige aınaldyrǵandaryńyzǵa rahmet. Bastysy elimiz aman, jurtymyz tynysh bolsyn»,— dedi ardagerdiń uly Dýlat Qaıyruly.

Aıta keteıik, eskertkish taqta 29-shy shaǵyn aýdandaǵy 15-shi úıge ornatyldy.