Aqtaýda sırek kezdesetin aýrýǵa shaldyqqan búldirshinge 38 mln teńgeniń dárisi salyndy

AQTAÝ. QazAqparat - Mańǵystaý oblysy kópbeıindi balalar aýrýhanasynda alǵash ret SMA aýrýyna shaldyqqan búldirshinge quny 38 mln turatyn «Spınraza» atty preparat salyndy, dep habarlaıdy QazAqparat.

Balalar aýrýhanasy dırektory Gúljan Ermekbaevanyń aıtýynsha, emdik preparat quny respýblıkalyq bıýdjetten qarjylandyrylǵan.

SMA - julyn bulshyqetteriniń atrofııasy, julyn bulshyqetiniń qımyl-qozǵalysqa jaýap beretin bóliginiń álsizdiginen týyndaıtyn sırek kezdesetin týabitti aýrý túri.

M.Ospanov atyndaǵy Batys Qazaqstan medıtsına ýnıversıteti «nevrologııa jáne psıhatrııa» kafedrasynyń bólim meńgerýshisi, dotsent D.N Aıaǵanov, Mańǵystaý oblystyq kópbeıindi balalar aýrýhanasynyń nevrologııa bóliminiń meńgerýshisi Marııa Aldabergenova jáne atalǵan aýrýhananyń reanımatsııa bóliminiń meńgerýshisi Mereke Nurdáýletuly jalpy anestezııa boıynsha ınpratekaldi túrde búldirshinniń julyn-mıyna «Spınraza» atty gendik preparatty ekti.

Dárigerler medıtsınalyq kórsetkish boıynsha naýqastyń qımyl-qozǵalys deńgeıi jaqsy dep baǵalady. Em-shara asqynýsyz ótken.

Jalpy atalǵan preparatty naýqasqa 4 márte salý qajet.

Endi dári 3 qańtar, 20 qańtar jáne aqpan aıaǵynyń sońynda salynady.

Preparatty salmastan buryn dárigerler naýqastyń jaǵdaıyn qadaǵalap, tolyq tekserýden ótkizedi.

Sondaı-aq, «Spınraza» ampýlasynan bólek, SMA aýrýyna shaldyqqan balalarǵa tabletka túrindegi «Rısdıplam» atty dári de taǵaıyndalyp otyr.

Aıta keteıik, búginde Mańǵystaý oblysynda julyn bulshyqet atrofııasy genetıkalyq aýrýyna shaldyqqan 4 bala bar.

Olar árdaıym ata-ananyń jáne dárigerlerdiń baqylaýynda.