Aqtaýda pandýstan qulaǵan múmkindigi shekteýli turǵynǵa 1,5 mıllıon teńge tólendi

<p>AQTAÝ. KAZINFORM &ndash; Oqıǵa bıyl 18 qańtarynda bolǵan. Múgedektigi bar turǵyn memlekettik mekemeniń ǵımaratynyń kire berisindegi pandýstyń tarlyǵynan jáne bıik bolýynan, arbamen jerge qulaǵan.</p>

Sot-medıtsınalyq saraptama qorytyndysyna saı, ol orta dárejedegi dene jaraqatyn alǵan.
Múmkindigi shekteýli turǵyn em qabyldaýǵa, dári-dármekter alýǵa ketken materıaldyq jáne ózine kelgen moraldyq zalaldardy óndirýdi surap, sotqa aryzdandy.

Osy oqıǵa boıynsha eńbek jáne áleýmettik qorǵaý komıtetiniń Mańǵystaý oblysy boıynsha departamenti memlekettik mekemege qatysty tekserý júrgizgen. Nátıjesinde, mekemeniń pandýsy «Ǵımarattar men ımarattardy halyqtyń qımyly shekteýli toptary úshin qoljetimdiliktiń esebimen jobalaý» erejeler jınaǵynyń 3.06-101-2012 4.3.2.30 jáne 3.06.-101-2012 4.3.2.2. tarmaqtaryna saı kelmeıtini, ıaǵnı pandýstyń ekinshi satysynyń kólbeýi joǵary jáne ǵımarattyń pandýsynyń kire beris alańynyń kólemi tar ekeni anyqtaldy.

Sotta memlekettik mekemeniń kire berisindegi pandýstyń zań normalaryna sáıkes kelmeýinen, talap qoıýshy turǵyn dene jaraqattaryn alǵany, oǵan materıaldyq jáne moraldyq zalaldar kelgeni anyqtaldy.

Sondyqtan sot sheshimimen memlekettik mekemeden múgedektigi bar turǵynnyń paıdasyna 500 myń teńge materıaldyq jáne 1 mıllıon teńge moraldyq shyǵyn óndirildi.