Aqtaýda órtelip jatqan qańǵybas ıtterdiń vıdeosy eldi shoshytty

<p>AQTAÝ. KAZINFORM &mdash; Aqtaýda qańǵybas ıtterdi aýlap, keıin olardy joıý kezinde atqarylǵan jumysqa turǵyndar shaǵym aıtty.</p>

Jergilikti bloger Azamat Sársenbaev áleýmettik jelide qala syrtyndaǵy úı janýarlaryn órteý deregine qatysty beınejazbany bólisti.

Atalǵan oqıǵaǵa baılanysty turǵyndar órttiń tútininen bólek, aınalaǵa jaǵymsyz ıis taraıtynyn aıtqan.

Alaıda Mańǵystaý oblystyq aýyl sharýashylyǵy basqarmasy basshysynyń orynbasary Berdibek Marhabaev bári tıisti normalarǵa sáıkes atqarylyp jatqanyn málimdedi.

«Aqtaý veterınarııa stantsııasy qala aýmaǵynda qańǵybas ıtterdi aýlap, joıý jumysyn tek qala turǵyndarynyń aryzy negizinde júzege asyrady. Al ólgen ıtter arnaıy qazylǵan shuńqyrda órtelip jatyr. Qańǵybas ıtter „Janýarlarǵa jaýapkershilikpen qaraý týraly“ zańnyń 15-babynyń 4-tarmaǵyna sáıkes turǵyndar ótinishi negizinde aýlandy. Onyń barysynda zalalsyzdandyrylǵan ıtter aýlanbaıdy. Sebebi olardyń qulaǵynda alystan kórinetin syrǵasy bar. Joǵaryda kórsetilgen vıdeotúsirilimdegi órtelgen ıtter ishinde syrǵasy bar ıtter joq», — dedi Berdibek Marhabaev. 

Basqarma basshysynyń orynbasary qala aýmaǵynda qaraýsyz júrgen ıtterdi aýlaǵan soń olardy ustaıtyn oryn ázirge daıyn emes ekenin aıtyp otyr. Qazir osyǵan qatysty tıisti jumys bastalǵan.

«Qaraýsyz ıt-mysyqqa arnalǵan panajaı boıynsha Aqtaý qalasynyń ákimdigi 2021 jyly № 7 óndiristik aımaqtyń № 77 jer ýchaskesinde ornalasqan qoıma men 1,8523 ga jer ýchaskesi qarastyryldy. Qalalyq qurylys bólimi tarapynan 2023-2025 jyldarǵa arnalǵan bıýdjettik ótinimge qaraýsyz júrgen ıt-mysyqqa arnalǵan panajaı qurylysynyń jobalyq smetalyq qujatyn jasaýǵa konkýrs jarııalanyp, „MastInjProekt“ JShS jeńimpaz retinde jumysyn bastady. Bólingen qarjy kólemi — 14 318 937 teńge», — dedi B.Marhabaev.

Ólgen úı janýarlaryn órteýge turǵyndar shaǵym bildirip otyr. Alaıda ólekseni órteıtin arnaıy pesh áli salynbaǵan.

«Aqtaý aýmaǵynda tıptik úlgidegi mal qorymy men ınsınerator peshin salý qajet ekendigin eskere otyryp № 7 óndiristik aımaqtan jer bólindi. Aqtaý qalalyq qurylys bóliminiń tapsyrysy boıynsha 2020 jyly JSQ jasalyp, 2021 jyly 5 sáýirde táýelsiz saraptamadan ótkizildi. Joba quny — 160 mln teńge. Mal qorymy jáne ınsınerator peshi qondyrǵysyn salatyn merdiger — „ABTM“ JShS. Atalǵan mekememen 2023 jyldyń 8 tamyzynda kelisimshart jasaldy. Qazirgi tańda elektr jelilerin tartý jumysy júrip jatyr», — dedi aýyl sharýashylyǵy basqarmasy basshysynyń orynbasary.