Aqtaýda oqýshylar mektepke kireberiste taptalyp qala jazdady

<p>AQTAÝ. KAZINFORM&nbsp;&mdash; Keleńsiz jaǵdaı 34-shaǵyn aýdandaǵy nómiri 19-jalpy bilim berý mektebinde boldy. Mektep ákimshiligi ekinshi aýysymda oqıtyn synyptyń oqýshylaryn ǵımaratqa sabaqtyń bastalýyna 5 mınýt qalǵanda kirgizgen. Saldarynan kire beriste keptelis bolyp, balalar bir-birin ıterip, janshylyp qalǵan.&nbsp;</p>

Ata-analardyń aıtýynsha, ekinshi aýysymnyń oqýshylary kún saıyn mektepke kire almaı, esik aldynda kútýge májbúr.

- Qyzym kúnde shaǵymdanatyn. «Mekteptiń esigin sabaq bastalýǵa bes mınýt qalǵanda ǵana ashady, bala kóp, 5 mınýtta kirip úlgermeımiz» — deıtin. Men baryp kóreıin dep sheshtim. Rasynda da solaı eken. Oqýshylardy ishki kirgizbeıdi. Esik ashylǵanda júzdegen bala ishke lap berip, talasyp-tarmasyp kiredi. Esik aldyndaǵy kúzetshiden suraǵanymda, bul dırektordyń tapsyrmasy dedi, — deıdi ata-analardyń biri.

Aqtaý qalalyq bilim bólimi jaǵdaıdyń baqylaýǵa alynǵanyn jetkizdi. Al, mektep ákimshiligi bolsa, atalǵan oqıǵanyń birinshi ret bolǵanyn aıtady.

- Áleýmettik jelilerde taralǵan beınejazba Aqtaý qalasynyń №19 mektebinde 24 qyrkúıek kúni saǵat 13:45-te mektepte pedagogter arasynda ótken jınalys kezinde jáne muǵalimder arasyndaǵy kezekshiliktiń aýysý sátinde bolǵan. Máselege qatysty jaýaptylarǵa eskertý jasalyp, mektep ákimshiligine balalardyń qaýipsizdigine asa kóńil bólý, oqýshylardy ǵımaratqa ýaqtyly kirgizýdi qadaǵalaý qatań eskertildi. Aıta ketetin jáıt, bul mektepte oqytý 3 aýysymda júredi, jyl saıyn oqýshy sany kóbeıýde. Máseleni 2024-2025 jyldary júzege asyrylatyn «Jaıly mektep» jobasy aıasyndaǵy jańa mektep qurylysy negizinde sheshý josparlanǵan. Másele baqylaýda, - delingen habarlamada. 

Mańǵystaý oblystyq bilim basqarmasy baspasóz qyzmeti búgin, 25-qyrkúıekte 19-mektepte jaǵdaı túzelip, eshqandaı qysym bolmaıtynyn habarlady.

Buǵan deıin, Mańǵystaýda bıyl jatyr moıny obyrynan 10 áıeldiń kóz jumǵanyn jazǵan bolatynbyz.