Aqtaýda qurylys kompanııasyna aldanǵan salymshylardyń aqshasy qaıtaryla bastady

AQTAÝ. QazAqparat - Mańǵystaýda qurylys kompanııasyna aldanǵan salymshylardyń máselesi sheshile bastady, dep habarlaıdy QazAqparat tilshisi Aqtaý qalasy ákiminiń baspasóz qyzmetine silteme jasap.

Mańǵystaý ákimdigi úleskerlerdiń máselesin sheshý maqsatynda basqa qurylys kompanııasymen kelisimge kelip, zardap shekken salymshylarǵa páter berý nemese aqshasyn qaıtarý jaıyn pysyqtap jatyr. Búginge deıin 6 úleskerdiń qarjysy qaıtaryldy.

«20 shaqty kompanııany shaqyryp qala qurylysshylarymen jınalys bolǵan. Sonyń ishinen óziniń usynysyn bildirgen eki kompanııa boldy. «K7 grýpp» kompanııasyna aldanyp qalǵan turǵyndar bastamany qoldady. Másele kezindegi salymshylar men jeke ınvestordyń eki ortadaǵy kelisimi negizinde sheshilip jatyr», - dedi Aqtaý qalasynyń sáýlet jáne qala qurylysy bóliminiń basshysy Beknur Balıuly.

Aıta keteıik, buǵan deıin Aqtaýda 200 úlesker zańsyz qurylysqa aqsha salyp, aldanyp qalǵanyn jazǵan bolatynbyz. «Gaýhar tas» turǵyn úı keshenin salýshy kompanııa páterlerdi birneshe ret satyp jibergen. Keıin salymshylardyń aqshasyn alyp, qashyp ketken.

Keıin turǵyndardy pátersiz qaldyrǵan kompanııa basshysy qamaýǵa alyndy. Qylmystyq kodekstiń 190-baby 4-bóliginiń 2-tarmaǵymen sotqa deı̆ingi tergeý bastaldy. Qazir 20 shaǵyn aýdanda zańsyz turǵyn úı qurylysy toqtatyldy.