Aqtaýda kórshisi sepken ýdan eki balanyń kóz jumýy: Aıjan Esmaǵambetova pikir bildirdi
«Qazirgi kezde epıdemıologııalyq tergep tekserý ótkizilip jatyr. Sonyń qorytyndysy boıynsha páter ıesi dezınfektsııa jumystaryn óz betimen ótkizip, dezınfektsııa quraldaryn bazardan satyp alyp, úıde ony qaldyryp, óz otbasyn alyp ketken. Ýly zat jeldetý júıesimen kóterilip, sol úıde turǵan kórshilerinde osyndaı jaǵdaı tirkeldi. Qazir qylmystyq tergeý bastaldy», - dedi bas sanıtar dáriger.
Onyń aıtýynsha, keıingi 3-4 jylda zııankestiń ýynan adamnyń qaıtys bolýy birneshe ret tirkelgen. Sondyqtan zııankesterdi ýlaýmen aınalysatyn uıymdardyń qyzmetin lıtsenzııa arqyly retteý tetigin qaıta kúshine engizý kózdelip otyr.
«Bıologııalyq qaýipsizdik zańynyń aıasynda kelesi jyldan bastap barlyq dezınfektsııa, deratızatsııa jumystary lıtsenzııalaýdan ótedi. ıAǵnı, sondaı jumystardy ótkizý úshin lıtsenzııa alý kerek bolady. Biraq bul óte kúrdeli jaǵdaı. Bizdiń azamattarǵa beretin keńesim, ýlaý quraldaryn satyp alǵan kezde memlekettik tirkeý týraly kýáligi men nusqamasyn suraý kerek. Nusqamaǵa qarap qana osyndaı jumystardy ótkizýge bolady. Biraq dezınfektsııa, deratızatsııa jumystaryn ótkizetin mamandardyń qyzmetine júgingen durys. Óz betimen úıde ondaı jumystardy ótkizbeý kerek.
Buǵan deıin zııankesterdi ýlaý jumystarymen aınalysatyn uıymdardyń qyzmeti lıtsenzııamen rettelmeıtin. 2007 jylǵa deıin ondaı retteý boldy, keıin alyp tastalǵan. Keıingi 3-4 jylda Aqtaýdaǵy sııaqty 3-4 jaǵdaı boldy. Sondyqtan biz «Bıologııalyq qaýipsizdik týraly» Zań aıasynda osyndaı lıtsenzııalaýdy kirgizemiz», - dedi Aıjan Esmaǵabteova.
Eske salsaq, Aqtaýda qandala ýynan kórshi páterdegi 2021, 2022 jyly týǵan balalar kóz jumǵan edi.
Zııankesti ýlaý sharasyn talapqa saı ótkizbegen páter ıesi 5 jyldan 10 jylǵa deıin bas bostandyǵynan aıyrylýy múmkin.