Aqtaýda Qazaq-nemis turaqty ınjenerııa ınstıtýty ashyldy
Búgin Sh. Esenov atyndaǵy Kaspıı tehnologııalar jáne ınjınırıng ýnıversıteti men jáne Qazaqstan-Nemis ýnıversıtetiniń birlesken bastamasymen Aqtaý qalasynda Qazaq-nemis turaqty ınjenerııa ınstıtýty ashyldy.
Saltanatty rásimde jańa ınstıtýt ǵımaraty boı kóteretin orynǵa eskertkish kapsýlany Germanııa Federatıvtik Respýblıkasynyń Prezıdenti Frank-Valter Shtaınmaıer men QR Premer-mınıstri Álıhan Smaıylov saldy.
Sondaı-aq, QR Ǵylym jáne joǵary bilim mınıstri Saıasat Nurbek, Mańǵystaý oblysynyń ákimi Nurlan Noǵaev, Qazaqstan-Nemis ýnıversıtetiniń prezıdenti Volrad Rommel men Yessenov University prezıdenti Berik Ahmetov rásimge qatysty.
Nemis ýnıversıtetter konsortsıýmy aıasynda ashylǵan jańa ınstıtýt Mańǵystaý óńirinde tehnıkalyq ónerkásiptiń ártúrli salalarynda jumys isteıtin mamandardy daıyndaýǵa múmkindik beredi dep kútilip otyr.
«Qazaq-nemis turaqty ınjenerııa ınstıtýtyn qurý Mańǵystaýda energetıka, logıstıka, munaı-hımııa, ekologııa, aqparattyq tehnologııalardy damytý jáne óńirdiń ınfraqurylymyn jaqsartý úshin kadrlar daıarlaýdy qamtamasyz etýge múmkindik beredi. Bul joba Mańǵystaý jastaryna jańa mamandyqtardy ıgerýge jáne zamanaýı ındýstrııa talaptaryna sáıkes sapaly bilim alýǵa jol ashady. Germanııa men Qazaqstan arasyndaǵy seriktestik olarǵa ekonomıkalyq tıimdi, áleýmettik ádil jáne ekologııalyq turaqty júıe qurý úshin tájirıbe men bilim almasýǵa múmkindikke jol bastaıdy», – dedi Á.Smaıylov.
Qazaq-Nemis turaqty ınjenerııa ınstıtýtyn qurý qarsańynda Berlın tehnıkalyq ýnıversıteti, Vıldaý tehnıkalyq ýnıversıteti, Gambýrg tehnıkalyq ýnıversıteti, Anhalt qoldanbaly ǵylymdar ýnıversıteti jáne Darmshtadt tehnıkalyq ýnıversıteti sııaqty Germanııanyń jetekshi joǵary oqý oryndarymen 8 bakalavrıat jáne 6 magıstratýra boıynsha qos dıplom men úsh dıplomdy bilim baǵdarlamalaryn iske asyrýdy josparlap otyr.
«Keshe Aqordada Qazaqstan-Nemis ýnıversıteti (DKU) men Esenov ýnıversıteti (YU) basshylary bolyp, Aqtaý qalasynda Qazaq-nemis turaqty ınjenerııa ınstıtýtyn qurý týraly qorytyndy qujatqa qol qoıdyq. Sodan soń Astanada ótken Qazaqstan men Germanııa ýnıversıtetteri rektorlarynyń sımpozıýmynda ózara yntymaqtastyq týraly memorandýmdar jasastyq. Onyń ishinde Berlın tehnıkalyq ýnıversıteti, Qazaqstan-Nemis ýnıversıteti jáne Esenov ýnıversıteti arasyndaǵy kelisimge qol qoıylsa, eki dıplom alý jóninde Vıldaý tehnıkalyq ýnıversıteti, Qazaqstan-Nemis ýnıversıteti jáne Esenov ýnıversıteti arasynda kelisim jasaldy. Sondaı-aq, Anhalt qoldanbaly ǵylymdar ýnıversıteti, Qazaqstan-Nemis ýnıversıteti, Esenov ýnıversıteti arasyndaǵy kelisimge qol qoıdyq», – dedi Yessenov University prezıdenti Berik Ahmetov.