Aqtaýda Kaspıımańy Memleketteri basshylarynyń sammıtine daıyndyq talqylandy
Bul týraly Túrikmenstannyń Qazaqstan Respýblıkasyndaǵy Elshiligine silteme jasap «QazAqparat» HAA habarlaıdy.
Sapar aıasynda Túrikmenstan elshisi Mańǵystaý oblysynyń ákimi Eraly Toǵjanovpen kezdesti. Resmı kezdesýde Kaspıımańy elderiniń Memleket basshylarynyń aldaǵy sammıtine daıyndyq, sondaı-aq Túrikmenstan men Qazaqstan Prezıdentteriniń shekaralyq oblystardyń ózara yqpaldastyǵyn tereńdetýge qatysty tapsyrmalaryna oraı, eki el arasyndaǵy saýda-ekonomıkalyq yntymaqtastyqty keńeıtý máseleleri talqylandy.
Kezdesýde aldaǵy sammıtte Túrikmenstan Prezıdentiniń bastamasymen saýda-ekonomıkalyq qarym-qatynastardy damytý jónindegi kelisimderdiń, Kaspıımańy elderimen kólik yntymaqtastyǵy máseleleri jónindegi kelisimderdiń jobalaryna qol qoıýǵa daıyndyq júrip jatqany aıtyldy.
Sharaǵa Mańǵystaý oblysy ákimdigi apparatynyń basshysy A.K. Rzahanov pen baspasóz qyzmetiniń basshysy S. Súleev qatysty.
Kezdesý sońynda T. Kómekov «Aqtaý halyqaralyq teńiz saýda porty» UK» AQ-ǵa baryp, jumysymen tanysty.