Aqtaýda Kaspııde júzý týry ashylady

AQTAÝ. QazAqparat - Mamyr aıynda Aqtaýda týrıstik qyzmet kórsetýdiń jańa túri - Kaspııge katamaran ıahtasymen serýen jasaý ashylady. Teńizge ekskýrsııalyq-serýen jasaý týrynyń baǵasy barlyǵy úshin qoljetimdi bolyp jasalǵan. Bir saǵattyq serýenniń quny 1 myń teńge shamasynda, dep habarlaıdy «QazAqparat» HAA tilshisi.  

Osy qyzmet túri úshin Astrahan qalasynda 35-40 adamdyq arnaıy 2 katamaran qaıyq jasalýda.
 

«Bul jobany «Týrızm» baǵdarlamasy boıynsha ekinshi deńgeıli bankten «Damý» qory arqyly jylyna 7,8%-dyq jarnasy sýbsıdııalanǵan 80 mln teńgemen qarjylandyryldy. Sondaı-aq, oǵan biz kepildik berdik», - dep atap ótti «Damý» qory» AQ Mańǵystaý oblystyq bólimshesiniń menedjeri Abaı Mombekov.

«Katamarannyń qurylysy úshin 80 mln teńge, ıaǵnı berilgen nesıeniń somasy jumsalady. Alaıda, ınfraqurylym salýymyz kerek, sondaı-aq turaq pen qyzmet kórsetý jasaýymyz qajet. Turaqty 14 móltekaýdanǵa qarsy bettegi jaǵalaýda turǵyzǵymyz keledi. Budan bólek, «Stıgl» men «Dostar» jazǵy demalys bazasy burynǵy qaıyq turaqtaryn qoldanýǵa usynys jasady. Bulardyń barlyǵy bıznes-josparda kórsetilgen. Sol sebepti qosymsha qarjylandyrý máselesi qarastyrylýda jáne «Damý» qory bul joly da qol ushyn beredi dep úmittenemin», - deıdi «Gýna-Aktaý» JShS dırektory Natalıa Vorojeıkına.

Ol serýendeý maýsymyn mamyr aıynda bastamaqshy, sondyqtan katamarandardyń qurylysy sáýir aıynda aıaqtalýy tıis.
 

«Damý» qory arqyly bir jylda 6547 mln teńgelik 127 joba sýbsıdııalandyryldy. Nesıelerdiń jalpy somasy 6,8 mlrd teńgeni quraıdy. 770 mln teńgege 56 kepildeme berildi.