Osyǵan oraı, oblystyq orman sharýashylyǵy jáne janýarlar dúnıesi aýmaqtyq ınspektsııasynyń qyzmetkerleri 21 sáýiri kúni atalǵan aýmaqqa ıaǵnı, Aqtaý qalasynyń Aktau Riviera jáne Rixos Golf & Villas demalys oryndary jaǵalaýyn qaraý jumystaryn júrgizgen. Nátıjesinde 3 úırek tektes qustyń (poganka), 2 sý quzǵynynyń (bolshoı baklan), 2 shaǵala men 2 qasqaldaq óleksesin anyqtady.
Mamandardyń aıtýynsha, qustar shamamen 1 aı buryn ólgen. Sebebi, deneleri búlinip, shirip ketken, veterınarlyq synama alýǵa múmkindik bolmaǵan. Biraq, qustardyń jappaı ólimi tirkelmegen.
- 2025 jyldyń aqpan-naýryz aılarynda Mańǵystaý oblysy aýmaǵynda qustardyń kóktemgi maýsymdyq mıgratsııasy júrip, myńdaǵan qustar, onyń ishinde úırek tektes qustar, qasqaldaq, shalshyqshy, sondaı-aq aqqý, qoqıqaz jáne basqa da qustar oblys aýmaǵyna, onyń ishinde teńiz jaǵalaýlaryna, Qarakólge kelip, naýryz-sáýir aıynda ushyp ketti. Osy mezgilde - birneshe myńdaǵan qustyń mıgratsııasy kezinde, álsiregenderiniń arasynda olardyń tabıǵı ólimi kezdesedi. Sońǵy kezdegi teńizden soqqan jeldiń saldarynan ólgen qustardyń deneleri jaǵaǵa shyǵyp qalǵan, - delingen aýmaqtyq ınspektsııa taratqan habarlamada.
Buǵan deıin, Aqtaýda oqýshylar synyptasynyń ókpesin qysyp, taldyryp tastaǵany týraly jazǵan bolatynbyz.