Aqtaýda «Kásipodaqtyq kóshbasshy mektebi» iske qosyldy

AQTAÝ. QazAqparat - Mańǵystaý oblysynda Áleýmettik ózara yqpaldastyq jáne kommýnıkatsııalar ortalyǵy QR Kásipodaqtar federatsııasymen birige otyryp, «Kásipodaqtyq kóshbasshy mektebi» jobasyn iske qosty.

Óńirdegi 25 kásipodaqtyń basshysy alty aılyq oqytý kýrsyn «Kásipodaqtyq kóshbasshylyq: bir adym alda» taqyrybyndaǵy modýlden bastady.

Qazaqstan Respýblıkasy Kásipodaqtar federatsııasy tóraǵasynyń orynbasary Erlan Saırov Mekteptiń tusaýkeserinde, «qazir dúnıejúzindegi barlyq kásipodaqtar ózgeristerge beıimdelýge talpynyp, zaman talabyna saı bilim alýǵa umtylady. Biz de álemdik trendterden qalmaýǵa tyrysamyz. Búgin mine, Áleýmettik ózara yqpaldastyq jáne kommýnıkatsııalar ortalyǵymen birlesip, «Kásipodaqtyq kóshbasshy mektebin» ashtyq. Osy joba elimizdegi kásipodaqtardy damytý isine súbeli úles qosady degen oıdamyz», - dep atap ótti.

Kásipodaqtyq kóshbasshy mektebi - kásipodaq qyzmetkerleriniń kásibı deńgeıin, olardyń eldiń turaqty damýyna úlesin arttyrýǵa baǵyttalǵan Qazaqstandaǵy alǵashqy keshendi bilim berý jobasy.

«Búgin birinshi modýl boıynsha oqytýdy bastadyq. Barlyǵy alty modýl bolmaq. Jobany Mańǵystaý óńirinde bastaýdyń sebebi de joq emes. Mańǵystaýlyq kásipodaqshylar elge bilgir ári myqty mamandar retinde tanymal», - dep atap ótti óz sózinde Áleýmettik ózara yqpaldastyq jáne kommýnıkatsııalar ortalyǵynyń bas dırektory Erbol Ismaılov.

Kásipodaq kóshbasshylary alty aıdyń ishinde kásipodaqtyq menedjment, áleýmettik-eńbek qatynastaryn retteý, kommýnıkatsııalar, qarjy jáne quqyqtyq saýattylyq, qyzmetkerlerdi basqarý, daý-damaılardy sheshý salasyndaǵy zamanaýı quraldaryn ıgeredi. Kelesi top Astana qalasynda qurylyp, oqýyn ústimizdegi jyldyń maýsym aıynda bastaıtyn bolady.

Eske sala ketsek, Áleýmettik ózara yqpaldastyq jáne kommýnıkatsııalar ortalyǵy 2017 jylǵy 4 mamyrda «Áleýmettik áriptestik ortalyǵynyń» negizinde qurylǵan. Ortalyqtyń maqsaty - «Samuryq-Qazyna» AQ kompanııalar tobynda áleýmettik ózara yqpaldastyq pen kommýnıkatsııalardyń aldyńǵy qatarly tájirıbelerin daıyndaý jáne engizý arqyly áleýmettik-eńbek qatynastaryn basqarý men kommýnıkatsııalardyń tıimdiligin arttyrý.