Aqtaýda karantın kezinde tyǵylyp toı jasaǵan meıramhanaǵa aıyppul salynady

AQTAÝ. QazAqparat - Aqtaýda mobıldi toptar kúsheıtilgen rejımde jumys istep jatyr, dep habarlaıdy QazAqparat tilshisi.

Polıtsııa qyzmetkerleri, ákimdik ókilderi dúkenderdi, saýda ortalyqtaryn, meı̆ramhanalardy jáne basqa da kásipkerlik sýbektilerin sanıtarlyq-epıdemıologııalyq talaptardy saqtaý boıynsha tekserýde.

Demalys kúnderi bolǵan reıd kezinde 1B shaǵyn aýdan 8/2 ǵımaratta ornalasqan «Shalaho» toıhanasynda merekelik sharanyń (toı) bolyp jatqany anyqtaldy. Monıtorıng toby saǵat 00:40 baryp, toıǵa kelgenderdi tarqatty. Osy jáne ózge de tártip buzýshylyqtar resmı túrde tirkelip, meıramhana basshylyǵyna akt toltyrylyp, túsinikteme alyndy.

Ári qaraı tıisti shara qoldaný úshin sanıtarııalyq-epıdemıologııalyq qadaǵalaý organdaryna joldandy.

Monıtorıng tobynyń ókilderi vırýs taralýyna yqpal etip, adamdar ómirin qaýipke tikkender jaýapkershilikke tartylatynyn eskertedi.

Sonymen birge, kásipkerlik sýbektileriniń basshylaryna sanıtarlyq-epıdemıologııalyq talaptardy buzý birneshe ret qaıtalanǵan jaǵdaıda, QR qoldanystaǵy zańnamasy sheńberinde kásipkerlik sýbektileriniń qyzmetin ýaqytsha toqtata turý sharasy qoldanylady.

Aıta keteıik, buǵan deıin Aqtaýda karantınge qaramastan tyǵylyp jumys istegen meıramhanalar anyqtalǵanyn jazǵan bolatynbyz.