Aqtaýda halyqaralyq «Caspian Startup-2023» baıqaýy qorytyndylandy
2023 jyly dástúrli baıqaýǵa Qazaqstan, Ázerbaıjan, Túrikmenstannan 200-den astam joba kelip tústi. Olardyń barlyǵy tabysty startaptardy qurý jáne ilgeriletýge, sondaı-aq startap mádenıetin qalyptastyrýǵa, ınvestorlar tartýǵa, zııatkerlik menshikti qorǵaýǵa baǵyttalǵan.
Fınaldyq týrǵa qatysýshylar ómir súrýdi jaqsartatyn IT-startaptardy usyndy.
«Bıyl besinshi ret ótkizilip otyrǵan baıqaýǵa ótinish bildirgen jobalar sanyn ótken jylmen salystyrar bolsaq eki ese kóp. Bul oqýshylardyń ǵylymǵa, IT salasyna degen qyzyǵýshylyǵynyń aıqyn belgisi. Baıqaýǵa qatysqan ár jas startaperden úlken úmit kútemiz», - dedi Aqtaýdaǵy zııatkerlik mekteptiń dırektory Rınat Jumabaev.
Eki irikteý kezeńnen súrinbeı, aqtyq saıysqa joldama alǵan eń úzdik avtorlar bıznes, bilim berý, medıtsına, IT jáne basqa da sala kásipqoılarynan iriktelgen bedeldi qazylar alqasynyń aldynda óz jobalaryn qorǵady.
Baıqaý nátıjesi boıynsha «Skincare AI» jobasy «Caspian Startup-2023» halyqaralyq baıqaýynda jeńiske jetti. Avtorlary Astanadaǵy NIS IB oqýshylary Dármen Aýsarbekov, Tomırıs Ydyrysbaeva, Araı Kamalıeva, Adelııa Aıtpaeva, Amır Jaqsylyq, Aıan Armanuly.
Oraz Qaıyrjan, Nursultan Zınýllın, Nurdáýlet Bazarǵalı, Mahambet Ótepqalı qurǵan Oral qalasynan kelgen komanda «DEO-1» aýyl sharýashylyǵyna arnalǵan kópfýnktsııaly dron jobasyn ázirlep, ekinshi oryndy ıelendi.
Qola júldeni Taldyqorǵan qalasyndaǵy fızıka-matematıka baǵytyndaǵy NIS oqýshysy Vıktor Kahnonyń «SeeTheFuture» jobasy men túrkistandyq NIS komandasynyń «TauFind» jobasy bólisti. Avtorlary Alpamys Sartaı, Dıas Asylbek, Álı Paızhan, Jarqynbek Jaılybek.
І oryn jeńimpazyna 150 000 teńge, ІІ oryn 100 000 teńge, ІІІ oryn ıegerine 50 000 teńge kóleminde qarjylaı syılyq tabystaldy. Áleýmettik jobalarǵa basa nazar aýdarylǵan baıqaý qatysýshylaryna elimizdegi eń úzdik joǵarǵy oqý oryndarynyń bilim granttary tabystaldy.
Safı Ótebaev atyndaǵy Atyraý munaı jáne gaz ýnıversıtetiniń granty berildi (atalǵan árbir qatysýshy úshin grant): Vıktor Kahno «SeeTheFuture» (Taldyqorǵan NIS), Aleksandr Tsıýpaı, Sergeı Trefılov «Aureamilium» (Qostanaı qalasy bilim bóliminiń fızıka-matematıkalyq lıtseıi), «Oqyrman AI» jobasy Ádil Shaıahmetov, Ábilmansur Alımbaev, Mansur Saıran, Almýbdı Mýtaıhan, Sultanbı Isataı (NIS Qaraǵandy).
Qazaq-Brıtan tehnıkalyq ýnıversıtetinde oqýǵa múmkindik alǵan qatysýshylar: Vıktor Kahno «SeeTheFuture» (NIS Taldyqorǵan), Mýtaıhan Almýbdı «Oqyrman AI» NIS Qaraǵandy (grant jobaǵa berildi), Amına Asadova «Robobin» (Ázerbaıjan, Baký qalasy, aǵaıyndy Novrýzovtar atyndaǵy №36 mektep).
Sh.Esenov atyndaǵy Kaspıı memlekettik tehnologııalar jáne ınjınırıng ýnıversıteti: Nursultan Zınýllın 100% grant (NIS Oral), Raýshan Turǵanbaı 75% grant (Qyzylorda NIS), Mýtaıhan Almýbdı 50% (Qaraǵandy NIS).
Sondaı-aq Mańǵystaý oblystyq aýrýhanasynyń epıdemıolog dárigeri Maral Qadyr «ExoGlove» (Aqtaý NIS), «DolphEYE» (Aqtaý NIS), «Fingerprintrecognition» (Qyzylorda NIS) jobalaryna arnaıy syılyǵyn tabystady.
Qazaqedu.som onlaın akademııasynyń dırektory Dına Fatıh Qostanaı qalasynan kelgen «Oñayoqu» jobasy, oraldyq oqýshylardyń «DEO-1» jobasyn árqaraı damytýǵa kómek beretinin jetkizdi.