Aqtaýda eskalatorǵa saýsaǵyn kesip alǵan balanyń jaǵdaıy belgili boldy

<p>AQTAÝ. KAZINFORM &mdash; Aqtaýda naýryz aıy bastalǵaly beri eki bala saýsaq jaraqatymen dárigerlerdiń kómegine júgindi.</p>

Mańǵystaý oblystyq kópbeıindi balalar aýrýhanasynyń baspasóz qyzmetiniń málimetinshe, atalǵan eki balaqaıǵa da ota jasaldy. Óńirdegi balalar aýrýhanasynyń travmatologııa bóliminiń meńgerýshisi Qurman Qaıranovtyń aıtýynsha, naýryz aıynyń biri kúni saýda úıleriniń birinde eskalatorǵa saýsaǵyn qysyp alǵan eki jarym jastaǵy bala aýrýhanaǵa jetkizilip, bólimshege jatqyzylǵan.

«Balaǵa ota jasalyp, jarasy qalypqa keldi. Qazir balanyń jaǵdaıy jaqsy deńgeıde. Búgin ata-anasy qolhatpen úıge alyp ketti, — dedi Qurman Qaıranov.

Budan bólek, Aqtaýda átkenshek teýip júrgen 7 jastaǵy qyz balanyń saýsaǵyn qysyp alǵany belgili boldy.

«Kishkentaı qyzdyń saýsaǵynyń ushy joq, jumsaq tinderi túsip qalǵan. Operatsııa jasap, túsip qalǵan terisi qaıta tigildi. Ol qazirgi ýaqytta bólimshede jatyr. Jaǵdaıy jaman emes. Ornyna tigilgen terisi tolyq bitisýine ýaqyt kerek. Dárigerlerdiń baqylaýyna alynyp, tıisti emin alyp jatyr, — dedi travmatologııa bóliminiń meńgerýshisi.

Buǵan deıin Aqtaýda saýda úıleriniń birinde eskalatorǵa saýsaǵyn qysyp, jaraqattap alǵan bala týraly aıtylǵan edi.