Aqtaýda eks-polıtseı kontrabandamen ustaldy
Aqtaý-Fort-Shevchenko baǵytyndaǵy tas joldyń 43-shi shaqyrymynda Toıota Korolla avtokóligin toqtatyp, tekserý kezinde 110 dana, ıaǵnı 318 keli bekire shyqqan. Zańsyz tasymalmen aınalysyp júrgen Mańǵystaý oblystyq polıtsııa departamentiniń burynǵy qyzmetkeri bolyp shyqty. Ol óziniń merzimi ótip ketken qyzmettik kýáligin kórsetip, aılasyn iske asyrmaq bolǵan. Alaıda saqshylar zeınetke ketken polıtsııa maıorynyń ústinen qylmystyq is qozǵap, tergeý amaldaryn bastap ketti.
«Oǵan qatysty QR QK 339-baby, 1-tarmaǵymen is qozǵalyp, tekserý jumystary bastaldy. Brakonerlerge qansha jerden tosqaýyl qoısaq ta, Qyzyl kitapqa engen bekire tuqymdas balyqty aýlaýdy toqtatar emes. Eki kúndik jedel profılaktıkalyq is-shara kezinde tabıǵatty qorǵaý polıtsııasynyń qyzmetkerleri osyndaı 2 faktini tirkep, 541 keli bekire tuqymdas balyǵyn tárkiledi»,-deıdi MO PD aqparat jáne memlekettik til bólimi basshysynyń mindetin atqarýshy Áıgerim Ibatýllaeva.
Taǵy bir zańbuzýshylyq 22-shaǵynaýdan, 6-úıdiń mańynda tirkelgen. Lada Granta avtokóligin tekserý barysynda 223 keli, 79 dana bekire balyǵy shyqqan. Qazir kináli azamatqa qatysty tekserý jumystary júrip jatyr.