Aqtaýda «Caspi Bike» velojarysy men zamanaýı mýzyka festıvali ótti

AQTAÝ. QazAqparat - Aqtaý qalasynda «Caspi Bike» velosherýi men «Teniz Music Fest» zamanaýı mýzyka festıvali ótti. Bul týraly óńirdegi Ortalyq kommýnıkatsııalar ortalyǵynan málim etti, dep habarlaıdy QazAqparat tilshisi.

150 adam qatysqan velosherýdiń jalpy uzaqtyǵy 20 shaqyrymdy qurady.

«Qatysýshylar erler, áıelder, 18 jasqa deıingi balalar kategorııalary boıynsha jarysqa tústi. Bir qyzyǵy, velosherý qorytyndysy boıynsha erler men áıelder arasynda jeńimpazdar ǵana emes, sonymen qatar eń júırik otbasy anyqtaldy», - delingen baspasóz málimetinde.

Erler arasynda birinshi bolyp márege jetken Dmıtrıı Kazakov 20 shaqyrymdy 34 mınýt 30 sekýndta eńserse, onyń jubaıy Evgenııa Kazakova osy qashyqtyqty 34 mınýt 33 sekýndta júrip ótip, áıelder arasynda úzdik nátıje kórsetti.

Erler arasynda Vıktor Obýlov – ekinshi oryn, Mıhaıl Alımov – úshinshi oryn alsa, áıelder arasynda Aqmaral Almabekova – ekinshi, Tatıana Eleferenko úshinshi bolyp máre syzyǵyn kesti.

«18 jasqa deıingi jasóspirimder» sanatynda Erjan Nurqamal birinshi oryn jeńip aldy. Al Rınat Nurjaý – ІІ oryn, Erkinǵalı Nurdáýlet ІІІ oryn ıelendi.

Velojarysqa tek Mańǵystaý oblysynyń turǵyndary ǵana emes, Reseıden, Bashqurtstannan kelgen qonaqtar da qatysty.

Velosherý sońy «Teniz Music Fest» atty zamanaýı qazaq mýzykasy festıvaline ulasty.

Jalpy velosherý men festıvalge 4 myń adam qatysty. Bul is-sharalar óńirdegi týrızm maýsymyn uzartý maqsatynda uıymdastyrylyp otyr.

Eske salaıyq, ótken aptada 10 myń qonaq qatysqan «Balqaimaq food» festıvali ótkenin jazǵan edik.

Al kelesi aptada, ıaǵnı 22-23 qazan aralyǵynda Saýra jáne Tamshaly shatqaldarynyń aýmaǵynda ploggıng-sherý uıymdastyrylmaq.