Aqtaýda bıyl 11 shaqyrymnan astam ınjenerlik jeli jańarady

<p>AQTAÝ. KAZINFORM &ndash; Jylý men sý qubyrlaryn modernızatsııalaý jobasy 3 jylǵa eseptelgen. Nátıjesinde magıstraldyq ınjenerlik jelilerdiń 22 shaqyrymy aýystyrylady. Bıyl sonyń 11 shaqyrym 300 metri jańartylmaq.</p>

- Qazirgi tańda jańartylatyn 11,3 shaqyrym bóliktiń 7 shaqyrymyna jańa qubyr salyndy. Qalǵan 4 shaqyrym bólikte (dıametri 500 mm bolatyn qubyrlardyń 900 metri, dıametri 720 mm bolatyn qubyrlardyń 1,5 myń metri shaqyrym) jańa qubyrlardyń kelýi kútilýde. Qazirgi tańda kelgen jańa qubyrlardy montajdaý jumystary júrgizilýde, - deıdi merdiger kompanııanyń dırektory Sáken Berdibaev.

Foto: Mańǵystaý oblystyq qoǵamdyq kommýnıkatsııa ortalyǵy

Aqtaýda magıstraldyq ınjenerlik jelilerdi modernızatsııalaý jumystary alǵash ret júrgizilýde. Qurylys jumystaryn jylytý maýsymyna deıin aıaqtaý mańyzdy. Sondyqtan qala ákimi jaýapty tulǵalarǵa naqty tapsyrmalar berdi.

- Jylytý maýsymyna daıyn bolý úshin jumystardy jedeldetý kerek. Sebebi jańa qubyrlardy montajdaý jumystary aıaqtalǵannan keıin, jaýapty mekemeler gıdravlıkalyq synaq ótkizýi qajet. Eger qurylys-montajdaý jumystary 30 qyrkúıekte aıaqtalsa, gıdravlıkalyq synaq júrgizý jumystary belgili bir ýaqyt alady. Jylýdan bólek, turǵyndarǵa ystyq sý berý máselesi bar. Brıgadalardyń jumysyn qadaǵalaý qajet, - deıdi Aqtaý qalasynyń ákimi Ábilqaıyr Baıpaqov.

Foto: Mańǵystaý oblystyq qoǵamdyq kommýnıkatsııa ortalyǵy

Oblystyq energetıka jáne turǵyn úı-kommýnaldyq sharýashylyǵy basqarmasy ókilderiniń aıtýynsha, magıstraldyq ınjenerlik jelilerdi jańartý jumystary basqarma men tehnıkalyq qadaǵalaý mamandarynyń baqylaýynda.

Aıta keteıik, buǵan deıin Aqtaý halyqaralyq áýejaıynda kúrdeli jóndeý jumystary bastalǵany týraly jazǵan bolatynbyz.