Aqtaýda basynan daý arylmaǵan kásiporyn ákimdik balansyna qaıtaryldy

AQTAÝ. QazAqparat – Aqtaýda tazalyq jumystarymen aınalysatyn «Qala joldary» JShS ákimdik balansyna qaıtarylatyn boldy. Bul týraly Mańǵystaý oblysy qoǵamdyq kommýnıkatsııa ortalyǵynda ótken brıfıngte Aqtaý qalalyq turǵyn úı-kommýnaldyq sharýashylyq bóliminiń basshysy Erǵalı Skendırov málim etti, dep habarlaıdy QazAqparat.

Onyń aıtýynsha, «Qala joldary» JShS negizgi quryltaıshysy - Aqtaý qalalyq ákimdigi. 2018 jyly senimgerlik basqarýǵa «Mańǵystaý BS» grýp JShS berilgen. Soǵan baılanysty Aqtaý qalalyq qarjy bólimi ótkizgen konkýrstyq negizde eki jaqty kelisimshart jasalǵan.

«Alaıda, 2020 jyly tabıǵı monopolııalardy retteý komıteti Mańǵystaý oblysy boıynsha departamentiniń nusqamasyna sáıkes «Qala joldary» JShS memlekettik basqarýǵa usynys túsken bolatyn. Qalalyq ákimdik tarapynan «Mańǵystaý BS» mekemesine habarlama berilgen. Dese de, tıisti jaýap berilmegendikten, kelisimshart birjaqty buzyldy. Qazirgi ýaqytta osy mekemege jańa basshy taǵaıyndalyp, alý-berý aktileri júrgizilip jatyr. Qalalyq ákimdik tarapynan komıssııa quryldy. Endi olar memlekettik múlikti qabyldaý boıynsha tıisti jumys júrgizedi», - deıdi Aqtaý qalalyq turǵyn úı-kommýnaldyq sharýashylyq bóliminiń basshysy Erǵalı Skendırov.

Mamandardyń aıtýynsha, qaladaǵy tazalyq jumysyn júrgizýge shamamen 600-700 adam jumyldyrylýy qajet. Degenmen 10 adamnyń jumysyn 1 adam jasaǵany, jumysshylar jalaqysynyń azdyǵy baıqalǵan.

«Aqtaý qalasynyń ákimdigi - osy mekemeniń quryltaıshysy. Degenmen, «Qala joldary» óz aldyna jeke mekeme retinde qyzmet etkende jumystyń durys júrgizilmegendigi anyqtaldy. Máselen, shaǵyn aýdandardaǵy qoqystyń ýaqytynda jınalmaýy, aǵashtardyń sýarylmaýy sııaqty olqylyqtar bolǵan. «Qala joldary» senimgerlik mekemesinde bolǵanymen, turǵyndar máselesin aıtyp, tikeleı ákimdikke shaǵymdanatyn. Sondyqtan máseleni sheshý úshin «Qala joldaryn» qalalyq ákimdik tarapyna qaıtaryp berý aktileri júrgizilip jatyr»,-deıdi Aqtaý qalalyq jolaýshylar kóligi jáne avtomobıl joldary bóliminiń basshysy Jetibaı Qubashev.

Aqtaý qalasy ákiminiń kelisimimen «Qala joldary» JShS jańa basshysy bolyp Ǵalymjan Serikbaev taǵaıyndaldy. Ol buǵan deıin «Kaspıı» áleýmettik kásipkerlik korporatsııasy», Qaraqııa aýdandyq «Turmys-Servıs» MKK mekemesinde qyzmet atqarǵan.

Eske sala keteıik, ótken jyldyń mamyrynda «Qala joldary» mekemesiniń qyzmetkerleri eńbekaqy ýaqytyly tólenbegenin aıtyp, qyzmettik mindetterin atqarýdan bas tartyp, qala kóshelerin tazalaýǵa shyqpaǵan bolatyn.

2017 jyly jeltoqsan aıynda Aqtaý qalasynyń ákimi Ǵalymjan Nııazov «Qala joldary» JShS tekserý júrgizgen edi.

Nátıjesinde 2016-2017 jyldar aralyǵynda kásiporynnyń 471 mln teńge qaryzǵa batqany anyqtaldy. Qordalanǵan qaryzdan qutylý maqsatynda 1245 jumysshynyń 448-i qysqartyldy.