Aqtaýda Atyraý oblysynan evakýatsııalanǵandarǵa arnalǵan qoǵamdyq kómek shtaby ashyldy

<p>AQTAÝ. KAZINFORM - Qoǵamdyq shtab músheleri sý tasqyny saldarynan evakýatsııalanǵan Atyraý oblysynyń turǵyndaryna kómek kórsetedi.</p>

Óńirlik qoǵamdyq kommýnıkatsııa ortalyǵynyń málimetinshe, shtab quramyna oblys, qala, aýdan máslıhattarynyń tóraǵalary men depýtattary, saıası partııalardyń ókilderi, úkimettik emes uıymdardyń basshylary syndy 30-ǵa jýyq adam enip otyr.

Qazir shtab músheleri túrli baǵyttar boıynsha jumys isteýdi bastady. Shtab basshysy Aıat Súgirbaıdyń sózinshe, evakýatsııalanǵan azamattarǵa aqparattyq jáne quqyqtyq qoldaý kórsetý jumystary qolǵa alynǵan.

«Biz ómirlik qıyn jaǵdaıǵa tap bolǵan adamdarǵa qoldaý kórsetýdi basty maqsat dep sanaımyz», — dedi Aıat Súgirbaı.

Ol shtab qyzmetiniń negizgi baǵyttarynyń biri — azyq-túlik baǵasynyń monıtorıngi ekenin de atap ótti. Osyǵan oraı Aıat Súgirbaı barlyq kásipkerlerdi baǵany kótermeýge shaqyrdy.

«Kásipkerlerden áleýmettik jaýapkershilik tanytýdy jáne apat aımaǵynan evakýatsııalanǵan azamattardyń máselelerine túsinistikpen qaraýdy suraımyn. Bul jaǵdaıdy baǵany negizsiz kóterý úshin paıdalanýǵa bolmaıdy. Biz el tarıhyndaǵy osy qıyn kezeńnen laıyqty ótip, barlyq qıyndyqtardy jeńetinimizge senimdimin», — dedi Aıat Súgirbaı.

Shtab ókili Jylyoı aýdanyndaǵy tasqyn sýdan zardap shekkenderge kómek qolyn sozyǵysy keletinder azyq-túlikti qabyldaý oryndaryna ákep tapsyrýǵa bolatynyn jetkizdi.

Keshe sý tasqynynyń aldyn alý boıynsha Mańǵystaýdan Atyraýǵa arnaıy tehnıkalar jiberilgen bolatyn. 

Sondaı-aq, Jańaózen qalasynan arnaıy tehnıkalardan quralǵan kómek brıgadasy Qulsaryǵa attandy.