Aqtaýda áskerı teńizshiler áskerı ant qabyldady
Bıylǵy kóktemde Soltústik Qazaqstan, Batys Qazaqstan, Pavlodar, Qaraǵandy, Almaty jáne Jetisý oblystarynan shaqyrylǵan 170-ten astam jas Otanyna adal bolýǵa ant berdi.
Іs-sharaǵa jergilikti atqarýshy organdardyń ókilderi, áskerı bólimderdiń komandırleri, Áskerı-teńiz kúshteriniń ofıtserleri men starshınalary, ardagerler, jas matrostardyń týystary men jaqyndary qatysty.
Áskerı-teńiz bazasynyń komandıri 2 dárejeli kapıtan Baýyrjan Muratuly jas jaýyngerlerge qyzmette tabys tiledi. Ol sondaı-aq alystan at arytyp kelgen ata-analarǵa alǵys bildirdi.
– Biz osy bir jaýapty sátti balalarymyzben birge bólisý úshin arnaıy keldik. Uldarymyzdyń áskerı boryshyn abyroımen oryndap, úılerine aman-esen oralýyn tileımin, – dedi Pavlodar oblysynan kelgen Qulzan Qalqanqyzy.
Jas matrostar qonaqtarǵa qoıan-qoltyq urys elementteri men saptyq daıyndyq ádisterin kórsetti.
Endi áskerı teńizshiler birneshe aıǵa sozylatyn oqýdan soń desanttyq-shabýyldaý batalonynyń, komendanttyq rotanyń jáne ártekti kemeler dıvızıonynyń bólimshelerine jiberiledi.