Aqtaýda áskerı tehnıkany jóndep jatqan sarbaz jaraqat aldy
18:46, 24 Aqpan 2022
AQTAÝ. QazAqparat - Qorǵanys mınıstrligi Aqtaý garnızonynda sarbazdyń jaraqat alýyna baılanysty túsinikteme berdi, dep habarlaıdy QazAqparat.
Bıylǵy 24 aqpanda Aqtaý garnızonynyń áskerı bóliminde merzimdi qyzmettegi qatardaǵy jaýynger T. áskerı tehnıkaǵa qyzmet kórsetý kezinde jaraqat alǵan.
«Qazirgi ýaqytta sarbazǵa qajetti medıtsınalyq kómek kórsetilip jatyr. Dárigerler áskerı qyzmetshiniń jaǵdaıyn ortasha aýyr deńgeıde dep baǵalady. Aqtaý garnızonynyń áskerı polıtsııa basqarmasy tekserý júrgizip jatyr. Oqıǵanyń sebepteri men mán-jaıy anyqtalý ústinde» delingen habarlamada.
Áskerı qyzmetshi 2021 jyldyń kúzinde Aqtóbe qalasynan merzimdi áskerı qyzmetke shaqyrylǵan bolatyn.