Aqtaýda aralas jekpe-jek chempıonatynda 17 jastaǵy sportshy qaıtys boldy

<p>AQTAÝ. KAZINFORM &mdash; Aqtaýda NOMAD MMA sportynan ótken oblys chempıonaty kezinde jasóspirim bala qaıtys boldy.</p>

Sportshynyń ólimi týraly Mańǵystaý oblystyq NOMAD MMA federatsııasynyń ókilderi málimdedi. Atalǵan chempıonat Aqtaý qalasyndaǵy «Batyr» sport kesheninde ótken.

«Jekpe-jek kezinde 17 jastaǵy sportshy qulap qaldy. Oǵan alǵashqy kómekti «Batyr» sport kesheniniń medıtsınalyq qyzmetkerleri kórsetti. Oqıǵa ornyna jedel járdem keldi. Ókinishke qaraı, jas jigitti ólimnen arashalap qala almady. Týrnır bastalmas buryn jattyqtyrýshy ótinim bergen kezde qatysýshynyń jarysqa daıyndyǵyn rastaıtyn medıtsınalyq anyqtama berdi. Qazirgi ýaqytta tergeý amaldary júrip jatyr. Quzyrly organdar bolǵan oqıǵanyń barlyq mán-jaıyn zerttep jatyr. Biz marqum sportshynyń jaqyndaryna qaıǵyryp kóńil aıtamyz», — dedi Mańǵystaý oblystyq Nomad MMA federatsııasynyń ókilderi.

Mańǵystaý oblystyq chempıonaty 30-31 naýryz kúnderi ótip, NOMAD MMA sportynan balalar, jasóspirimder, jastar jáne eresekter boıynsha 300-ge jýyq sportshy synǵa tústi.