Aqtaýda Almatydaǵy terrorlyq shabýyl kezinde qaza tapqan kýrsantpen qoshtasty

AQTAÝ. QazAqparat - Búgin Aqtaý qalasynda Almatydaǵy terrorlyq shabýyl kezinde qaza tapqan UQK Shekara akademııasynyń kýrsanty Bitim Meıirhanmen qoshtasýǵa arnalǵan qaraly mıtıng ótti, dep habarlaıdy Mańǵystaý oblysy ákiminiń baspasóz qyzmeti.

Aza tutý rásimine Mańǵystaý oblysynyń ákimi, memlekettik organ ókilderi, máslıhat depýtattary, óńirlik shekara qyzmetiniń jeke quramy, kýrsanttyń ata-anasy men týystary, muǵalimder men qala turǵyndary qatysty.

Óńir basshysy Nurlan Noǵaev bul qazanyń Bitim áýletiniń ǵana emes, barsha qazaqtyń ortaq qaıǵysy ekenin atap ótti.

«Meıirhan Erjanuly nebári 19 jasynda Otanǵa adal qyzmet etýdiń jarqyn úlgisin kórsetip ketti. Meıirhan baýyrymyzdyń erliginiń aldynda basymyzdy ıemiz. Onyń qaısarlyǵy kópke úlgi-ónege bolary sózsiz», - dedi Nurlan Noǵaev.

Memleket múddesin qorǵaýda kórsetken batyldyǵy men janqııarlyǵy úshin Prezıdent Jarlyǵymen Meıirhan Bitim qaıtys bolǵannan keıin III dárejeli «Aıbyn» ordenimen marapattaldy. Aza tutý rásimi barysynda bir mınýt únsizdik jarııalanyp, aspanǵa úsh ret oq atyldy.

«Bul dúrbeleńde órimdeı jastardyń qaza bolǵany janymyzǵa qatty batty. Eline qyzmet etýdi armandaǵan nemerem Meıirhan antyna adal boldy. Erjúrek balam betpe-bet kelgen ajaldan qaımyqqan joq. Mundaı jaǵdaıdyń endi eshqashan qaıtalanbaǵanyn tileımin. Halqymyzdyń aýyzbirshiligi artyp, balalarymyz beıbit kúnde ómir súrsin. Jaratqan Táýelsizdigimizdi máńgi etsin!», - dedi marqumnyń atasy Bitim Kezbaev.