Aqtaýda ákimdik bergen úıdiń qabyrǵasyna sańyraýqulaq ósip shyqty
Kópqabatty úıdiń qazirgi ahýaly turǵyndardy ábigerge salyp otyr.
Sebebi, mundaǵy páterlerdiń qabyrǵasy ylǵaldan kógerip ketken.
«33-shaǵynaýdandandaǵy 30-úıden baspana alǵan edik. Páterdiń qabyrǵasyna sańyraýqulaq shyǵa bastady. Ótken jazda jóndeý jumystaryn júrgizdik. Úıde kishkentaı balamyz bar. Qabyrǵa ylǵal tartqan soń arnaıy qurylǵy qosyp, keptirýge májbúrmiz. Jalǵyzbasty ana retinde ákimdik bergen páter edi. Alaıda úıdiń kireberisiniń qabyrǵasy da osyndaı jaǵdaıǵa dýshar boldy. Jýynatyn bólmeniń tóbesinde shaǵyn jaryqshaq bar», — deıdi turǵyn.
Atalǵan jaǵdaı boıynsha Aqtaý qalalyq turǵyn úı ınspektsııasy bólimi tıisti saraptama bastalǵanyn málimdedi.
«Turǵyn úı ınspektsııasy óz tarapynan úıdiń jaǵdaıyn bilý úshin tehnıkalyq saraptamaǵa konkýrs jarııalady. Konkýrs nátıjesi shyqqan soń turǵyn úı ınspektsııasy ony turǵyndarǵa baryp túsindiredi. Eger jóndeý qajet bolsa, turǵyn úı ınspektsııasy turǵyndarǵa „Qaıtarymdy qarajat“ modernızatsııalaý baǵdarlamasyn paıdalanýdy usynady», — dedi turǵyn úı ınspektsııasy bóliminiń mamandary.
Al aqpan aıynan bastap qaladaǵy 33-shi shaǵyn aýdandaǵy 30-32 úıler jańa PIK-ke berilip, tóraǵasy máseleni retteý jalǵasyp jatqanyn jetkizdi.
«1 aqpannan bastap bul úıge qyzmet kórsetý jumysyn aldyq. Qys boıy jylý bolmaǵandyqtan qabyrǵalarda ylǵal paıda bolǵan. Turǵynúılerge jylý berý jumysy endi ǵana aıaqtaldy. Páter ishine jóndeý júrgize almaımyz. Aryz bergen turǵyndardyń páterine jylý jetkizý boıynsha tıisti jumys atqaryldy. Jalpy, bul úılerdiń jaǵdaıy óte nashar. Jertóleniń bári ylǵal tartyp ketken. Aqtaý qalalyq turǵyn úı ınspektsııasy bólimi ótinim bergen soń qyzmet kórsetýge kelip otyrmyz. Sol mańdaǵy 30, 31 jáne 32 úıdiń birneshe kireberisine jóndeý jasadyq», — deıdi PIK tóraǵasy Valet Qulmuhambetov.