Aqtaýda Ábish Kekilbaıulyna arnalǵan fotokórme ótti
20:56, 10 Qazan 2019
AQTAÝ. QazAqparat - Ábish Kekilbaıulynyń 80 jyldyǵyna oraı Abaı atyndaǵy mádenı-demalys kesheninde fotokórme uıymdastyryldy, dep habarlaıdy QazAqparat tilshisi.
Kórmede abyz tulǵa, qalamgerdiń kózi tirisindegi 80-nen astam sýreti qoıylǵan. Ábish Kekilbaıuly ómiriniń eń jarqyn sátteri beınelengen fotolar kórermen kóńilinen shyqty. Kórme arqyly abyz tulǵanyń tek qalamger ǵana emes, sanaly ǵumyryn qazaq rýhanııatynyń ósip-órkendeýine arnaǵan saıasatker ekenin jáne Qazaqstannyń damýyndaǵy rólin aıqyn kóre alamyz.
Kórme avtory Serik Maıemerovtyń aıtýynsha, eń alǵashqy sýretter 2005 jyly túsirilgen.
«Kórmeni 4 taqyrypqa bóldim. Munda zamandastarymen, ásirese Farıza Ońǵarsynovamen birge júrgen shaqtary, qyzmettegi áriptesterimen, Elbasymen birge túsken sýretteri kóp»,-deıdi avtor.