Aqtaýda 78 otbasyna páter kilti tabystaldy

AQTAÝ. QazAqparat - Uly Jeńistiń 73 jyldyǵy merekesinde Aqtaýlyq áskerı jáne quqyq qorǵaý salasynyń qyzmetkerleri páterli boldy, dep habarlaıdy QazAqparat.

Mańǵystaý oblysynyń ákimi Eraly Toǵjanov «Aqqý-1» turǵyn úı kesheniniń kiltterin saltanatty túrde tabys etti.

Baspanaly bolǵandardyń qatarynda Іshki ister departamentiniń - 30, Ulttyq qaýipsizdik komıtetiniń - 33 jáne Batys aımaqtyq shekara qyzmeti bıýrosynyń 10 qyzmetkeri bar. Qazirgi tańda 339 úı paıdalanýǵa daıyn. Páterdi satý tetigi «Qazaqstan Turǵyn úı qurylys jınaq banki» AQ júıesimen jáne jeke, zańdy tulǵalarǵa tikeleı satý arqyly júzege asyrylady.

«Aqqý-1» turǵyn úı kesheninde 655 páter bar. 2009 jyly bastalǵan keshenniń qurylysy turalap, qaıta jandandy. Búginde 140 páteri daıyn. 78 páterdiń kilti áskerı qyzmetkerler men tártip saqshylaryna tapsyryldy.

«Ózderińiz jaqsy biletindeı bul turǵyn úı kesheni qansha jyldan beri úlken máselege aınalyp, ótken jyldan bastap oblys deńgeıinde komıssııa qurylǵan edi. Búgin mine «Aqqý» turǵyn úı kesheniniń alǵashqy kezeńi qoldanysqa berildi. Mine, biz búgin jańa baspanaǵa qol jetkizgen 78 otbasynyń qýanyshyna kýá bolyp otyrmyz. Memlekettik baǵdarlamalar sheńberinde áskerı jáne quqyq qorǵaý organdarynyń qyzmetkerlerine berilýiniń sımvoldyq máni zor. Bul beıbit ómirdiń batyrlary, eldiń tynyshtyǵyn kúzetip júrgen erlerge degen qurmettiń bir belgisi. Munyń barlyǵy Elbasymyz Nursultan Nazarbaevtyń áleýmettik bastamalary men reformalarynyń sátti júzege asqandyǵynyń aıqyn kórinisi. Halyqtyń ál-aýqatyn arttyrý, turmys-tirshiligin jaqsartý memleket basshysynyń jiti nazarynda. Sondyqtan naýryz aıynda Elbasy áleýmettik jańǵyrý jolynda aýqymdy qadam jasap, «Bes áleýmettik bastama» usyndy. Sonyń alǵashqy tarmaǵynda - «árbir otbasyna baspana alýdyń jańa múmkindikterin berý», - kerektigine nazar aýdarǵan bolatyn. «7 - 20 - 25» baǵdarlamasy bul sózime dálel», - dedi aımaq basshysy Eraly Toǵjanov.

2017 jyly tek Mańǵystaý óńiri boıynsha barlyǵy 833 myń sharshy metr turǵyn úı qoldanysqa berildi. Ol 2016 jylmen salystyrǵanda 17 paıyzǵa artyq. 2018 jyldyń sońyna deıin taǵy 916 myń sharshy metr turǵyn úı salý josparda bar. Alǵashqy toqsanda sonyń 337 myń sharshy metri tapsyrylyp qoıǵan.