Aqtaýda 700-ge jýyq bala Abaıdyń ánin bir mezette shyrqady

AQTAÝ. QazAqparat - Aqtaý qalasy hımııa-bıologııa baǵytyndaǵy Nazarbaev Zııatkerlik mektebiniń 700-ge jýyq oqýshysy Abaıdyń 175 jyldyq mereıtoıyna oraı aqynnyń «Kózimniń qarasy» ánin oryndady, dep habarlaıdy QazAqparat tilshisi.

Bilim ordasynyń oqýshylary #Abaı175 estafetasyn óńirdegi «Intellektým» lıtseıinen qabyldaǵan.

«Kózimniń qarasy» ánin kez kelgen qazaqstandyq biledi degen oıdamyz. Estafetanyń sharttaryn oryndaý maqsatynda arnaıy daıyndyq júrgizgen joqpyz. Bizge mektep aldyna shyǵyp án aıtatynymyz habarlandy. Úzilis kezinde óleńdi bir emes, úsh ret qaıtalap aıtyp shyqtyq», - deıdi mekteptegi ózin-ózi basqarý uıymynyń prezıdenti Raýan Ibragım.

Zııatkerlerdiń sózinshe, respýblıka boıynsha Abaı shyǵarmalaryn nasıhattaýǵa arnalǵan sharalarǵa belsendi qatysý arqyly balalar aqynnyń shyǵarmashylyǵymen jaqyn tanysady.

Oqýshylar estafetany Qyzylorda qalasyndaǵy Nazarbaev Zııatkerlik mektebine, Qaraqııa aýdany, Jetibaı kentindegi №8 jalpy orta mektebi men Fort-Shevchenkodaǵy M.Gorkıı atyndaǵy mektep-lıtseıine joldady.